అర్జున్ రెడ్డి చిత్రంతో యూత్ అటెన్షన్‌ను తనవైపు తిప్పుకున్న హీరో విజయ్ దేవరకొండ. లో బడ్జెట్‌తో తెరకెక్కిన ఈ సినిమా భారీ వసూళ్లను రాబట్టి నిర్మాతల పంట పండించింది.ఈ సినిమా తర్వాత వరుస సినిమాలకు గ్రీన్‌ సిగ్నల్‌ ఇస్తున్న విజయ్..మరోసారి ప్రేమకథా చిత్రంతో ప్రేక్షకుల ముందుకురానున్నాడు. శ్రీధర్ మర్రి దర్శకత్వంలో తెరకెక్కనున్న ఏం మంత్రం వేసావెలో హీరోగా నటించనున్నాడు.
దీపావళి సందర్భంగా చిత్ర బృందం ఫస్ట్‌లుక్‌ పోస్టర్‌ను విడుదల చేసింది. ఫస్ట్‌లుక్‌లో విజయ్ పడుకుని దీనంగా ఆలోచించడం సినిమాపై ఆసక్తిని పెంచుతోంది. గోలిసోడా ఫిలింస్‌ ప్రొడక్షన్స్‌ బ్యానర్‌పై ఈ చిత్రాన్ని నిర్మిస్తున్నారు. మరోపక్క విజయ్ గీతా ఆర్ట్స్‌ బ్యానర్‌పై అల్లు అరవింద్‌ నిర్మాణంలో వస్తున్న చిత్రంలోనూ నటిస్తున్నారు.
రాహుల్ సంక్రీత్యన్ దర్శకత్వంలో ఓ సినిమా చేస్తున్న విజయ్ ఇందులో క్యాబ్ డ్రైవర్‌గా కనిపించనున్నాడు. కామిక్ థ్రిల్లర్‌గా తెరకెక్కనున్న ఈ సినిమాలో హీరోయిన్‌గా అనంతపురంకు చెందిన ప్రియాంక జవాల్కర్‌ నటిస్తోంది. దీంతో పాటు అలనాటి నటి సావిత్రి జీవితాధారంగా వస్తున్న ‘మహానటి’ చిత్రంలోనూ ఆయన కీలక పాత్రలో నటిస్తున్నట్లు టాలీవుడ్‌ వర్గాల సమాచారం.
