తెలుగు సినీపరిశ్రమలో ప్రయోగాలు చేయడంలో విక్టరీ వెంకటేష్ ముందుంటారు. వెంకటేష్ నటించిన గురు మూవీ రిలీజ్ అయి నాలుగు నెలలు దాటిపోయింది. అయితే.. ఇప్పటివరకూ వెంకీ కొత్త సినిమా విషయంలో అధికారిక ప్రకటన రాలేదు. రెండు మూడు ప్రాజెక్టుల గురించి మాటలు జరిగినా.. అవేవీ వర్కవుట్ కాలేదు. ఇప్పుడు వెంకటేష్ హీరోగా కొత్త సినిమా ఖాయమైందని అంటున్నారు. అది కూడా ఓ మల్టీ స్టారర్ మూవీ కావడం విశేషం.
సీతమ్మ వాకిట్లో సిరిమల్లె చెట్టు అంటూ మహేష్ బాబుతో కలిసి ఓ సినిమా చేసి మల్టీ స్టారర్ ట్రెండ్ కు తెర తీసిన వెంకీ.. ఆ తర్వాత పవన్ కళ్యాణ్ తో కలిసి గోపాలా గోపాలా మూవీ చేశాడు. ఇప్పుడు యంగ్ హీరో విజయ్ దేవరకొండతో కలిసి వెంకటేష్ ఓ సినిమాలో నటించేందుకు అంగీకరించాడని తెలుస్తోంది. భాస్కర్ దర్శకత్వంలో రూపొందే ఈ చిత్రానికి ఇప్పటికే స్క్రిప్ట్ సిద్ధం కాగా.. త్వరలో అనౌన్స్ మెంట్ కూడా వచ్చే అవకాశం ఉందట. అర్జున్ రెడ్డి మూవీకి రిలీజ్ కు ముందే.. విజయ్ దేవరకొండ కూడా ఈ సినిమా చేసేందుకు అంగీకరించినట్లు తెలుస్తోంది.
ఇద్దరు హీరోలకు తగిన రీతిలో ప్రాధాన్యం ఉంటుందట కూడా. ఇపుడు అర్జున్ రెడ్డితో సెన్సేషనల్ విక్టరీ సాధించడంతో.. ఈ మల్టీ స్టారర్ మూవీలో విజయ్ దేవరకొండ నటించడమే స్పెషల్ అట్రాక్షన్ కానుంది. రాక్ లైన్ వెంకటేష్ ఈ మూవీకి నిర్మాతగా వ్యవహరించనున్నారు.
