తెలంగాణ స్టేట్‌ లెవెల్‌ పోలీస్‌ రిక్రూట్‌మెంట్‌ బోర్డు (టీఎస్ఎల్‌పీఆర్బీ) ఏప్రిల్‌ 28న పోలీసుల నోటీపీకేషన్లు సైతం జారీ చేసింది. తాజాగా ఎస్‌ఐ, కానిస్టేబుల్‌ ప్రిమిలినరీ పరీక్షలు నిర్వహించే తేదీలను బోర్డు ప్రకటించింది. ఆగస్ట్‌ 7న ఉదయం 10 గంటల నుంచి మధ్యాహ్నం ఒంటి గంట వరకు ఎస్‌ఐ ప్రిలిమినరీ పరీక్షను టీఎస్ఎల్‌పీఆర్బీ నిర్వహిస్తామని సోమవారం వెల్లడించింది. ఆగస్ట్‌ 21వ తేదీన ఉదయం 10 గంటల నుంచి మధ్యాహ్నం ఒంటి గంట వరకు కానిస్టేబుల్‌ పరీక్ష నిర్వహించనున్నట్లు బోర్డు తెలిపింది.తెలంగాణ ప్రభుత్వం 80,039 పోస్టుల్ని భర్తీ చేస్తామని ప్రకటించిన సంగతి తెలిసిందే. ఇందులో 17,291 పోస్టుల భర్తీకి టీఎస్ఎల్‌పీఆర్బీ ఆయా నోటిఫికేషన్ల ద్వారా మొత్తం 17,291 పోస్టుల్ని భర్తీ చేయనున్నది. ఇందులో 554 ఎస్‌ఐ పోస్టులు, 15,644 కానిస్టేబుల్‌ పోస్టులు, 614 ప్రొహిబిషన్‌, ఎక్సైజ్‌ కానిస్టేబుల్‌ పోస్టులను భర్తీ చేయనున్నారు.
ప్రస్తుతం పరీక్షల నిర్వహణకు కసరత్తు చేస్తున్నామని బోర్డు తెలిపింది. పరీక్షలకు హాజరయ్యే ఎస్‌ఐ అభ్యర్థులు ఈ నెల 30 నుంచి హాల్‌ టికెట్లు డౌన్‌లోడ్‌ చేసుకోవచ్చని, కానిస్టేబుల్‌ అభ్యర్థులకు సంబంధించిన హాల్‌ టికెట్లు ఆగస్ట్‌ 10 నుంచి www.tslprb.in వెబ్‌సైట్‌ నుంచి డౌన్‌లోడ్‌ చేసుకోవచ్చని బోర్డు తెలిపింది. ఎస్‌ఐ పోస్టులకు 2.45లక్షల మంది అభ్యర్థులు, కానిస్టేబుల్‌ పోస్టులకు 6.50లక్షల మంది అభ్యర్థులు దరఖాస్తులు చేసుకున్నారు.ఇప్పటికే బోర్డు దరఖాస్తులను సైతం స్వీకరించిన విషయం తెలిసిందే. ఎస్‌ఐ పోస్టులకుహైదరాబాద్‌ సహా 20 పట్టణాల్లో పరీక్షా కేంద్రాలు, కానిస్టేబుల్‌ పోస్టులకు హైదరాబాద్‌ సహా 40 పట్టణాల్లో పరీక్షా కేంద్రాలను ఏర్పాటు చేశామని తెలిపింది.
