హిజ్బుల్లాతో కాల్పుల విరమణకు అంగీకరించాల్సిందిగా తాను వ్యక్తిగతంగా ఇజ్రాయెల్ను కోరినట్లు అమెరికా అధ్యక్షుడు డొనాల్డ్ ట్రంప్ చెప్పారు. లెబనాన్లో పెరుగుతున్న హింస, ఇరాన్తో కుదిరిన సున్నితమైన శాంతి ప్రక్రియకు సంబంధించిన విస్తృత దౌత్య ప్రయత్నాలను దెబ్బతీసే ప్రమాదం ఉన్నందున తాను ఇందులో జోక్యం చేసుకున్నట్లు ఆయన పేర్కొన్నారు.
ట్రంప్ మాట్లాడుతూ… తాను ఇశ్రాయేల్ అధికారులతో మాట్లాడి సంయమనం పాటించాలని ఒత్తిడి తెచ్చానని, పోరాటం ఇలాగే కొనసాగితే విస్తృత ప్రాంతీయ ఒప్పందానికి విఘాతం కలగవచ్చని హెచ్చరించానని చెప్పారు. కొన్నిసార్లు మీరు కాస్త శాంతించి, ఆలోచించాలి (తల ఉపయోగించాలి)” అని ట్రంప్ అన్నట్లు ఈ సంభాషణ వివరాలను ఎక్స్ (X) లో పంచుకున్న ఒక ఎన్బిసి న్యూస్ రిపోర్టర్ తెలిపారు. అయితే, తాను ఇశ్రాయేల్ ప్రధాన మంత్రి బెంజిమిన్ నెతన్యాహుతో నేరుగా మాట్లాడారా లేదా అనే విషయాన్ని ధృవీకరించడానికి ఆయన నిరాకరించారు.
ప్రాంతీయంగా పెద్ద యుద్ధం వస్తుందేమోననే భయాందోళనలను రేకెత్తించిన తీవ్రమైన ఘర్షణల తర్వాత, ఇశ్రాయేల్ మరియు హిజ్బుల్లాలు కాల్పుల విరమణకు అంగీకరించిన కొద్ది గంటలకే ఆయన ఈ వ్యాఖ్యలు చేశారు. ఈ ఘర్షణలు అమెరికా-ఇరాన్ తాత్కాలిక ఒప్పందాన్ని ఒక శాశ్వత శాంతి రూపంలోకి మార్చడానికి జరుగుతున్న ప్రయత్నాలపై నీలినీడలు కమ్మేలా చేశాయి.
ఇరుపక్షాలు పరస్పరం కాల్పులు జరుపుకున్న తర్వాత, లెబనాన్ స్థానిక కాలమానం ప్రకారం సాయంత్రం 4 గంటల ప్రాంతంలో కాల్పుల విరమణ అమల్లోకి వచ్చిందని ఒక ఉన్నత అమెరికా అధికారి తెలిపారు. ఈ సంధి కుదర్చడంలో ఇరాన్ సహాయంతో పాటు అమెరికా, ఖతార్కు చెందిన రాయబారులు కీలక పాత్ర పోషించారని సదరు అధికారి పేర్కొన్నారు. కాల్పుల విరమణ అమల్లోకి వచ్చిన మొదటి గంటలో ఇజ్రాయేల్ పలు వైమానిక దాడులు చేసిందని అయితే సాయంత్రం 5 గంటల తర్వాత ఎలాంటి దాడులు జరగలేదని లెబనాన్ భద్రతా వర్గాలు తెలిపాయి.
Also Read:KTRను కలసిన TSEA ప్రతినిధులు
లెబనాన్లో ఉద్రిక్తతలు పెరగడం వల్ల స్విట్జర్లాండ్లో జరగాల్సిన అమెరికా-ఇరాన్ చర్చలు వాయిదా పడ్డాయి. ఇరాన్ అణు కార్యక్రమం మరియు ‘స్ట్రెయిట్ ఆఫ్ హార్ముజ్’ (Strait of Hormuz) భవిష్యత్తుపై చర్చలు ముందుకు సాగడానికి ఈ సమావేశం చాలా కీలకమైనదిగా భావించారు.
ఈ వారం ప్రారంభంలో కుదిరిన తాత్కాలిక ఒప్పందం ప్రకారం… ఇరాన్ అణు కార్యకలాపాలు, ఆంక్షల సడలింపు మరియు ప్రాంతీయ భద్రతా సమస్యలపై విస్తృతమైన ఒప్పందాన్ని చర్చించడానికి వాషింగ్టన్ మరియు టెహ్రాన్లు తమకు తాముగా 60 రోజుల సమయం ఇచ్చుకున్నాయి. ఇరాన్తో కుదిరిన తాత్కాలిక ఒప్పందాన్ని ట్రంప్ మరోసారి గట్టిగా సమర్థించుకున్నారు. టెహ్రాన్కు మితిమీరిన రాయితీలు ఇచ్చారంటూ విమర్శిస్తున్న కొందరు రిపబ్లికన్ మిత్రపక్షాల వాదనలను ఆయన తోసిపుచ్చారు.