పడుకునే ముందు ఒక్క ఐదు నిమిషాలు ఫోన్ చూద్దామని అనుకుంటారు కానీ ఒక వీడియో తర్వాత మరొకటి, ఒక హెడ్‌లైన్ తర్వాత కామెంట్స్ సెక్షన్.. ఇలా చూస్తూ చూస్తూ ఎప్పుడు పడుకోవాలో ఆ సమయం దాటిపోయినా స్క్రోలింగ్ చేస్తూనే ఉంటారు. ఈ అలవాటుకే ఒక పేరుంది: అదే ‘బెడ్‌టైమ్ డూమ్‌స్క్రోలింగ్’.
“డూమ్‌స్క్రోలింగ్” అంటే ప్రతికూల, ఆందోళన కలిగించే లేదా ఒత్తిడిని పెంచే వార్తలు మరియు సోషల్ మీడియా కంటెంట్‌ను గంటల తరబడి చూస్తూ ఉండిపోవడం. పడుకునే సమయంలో ఈ అలవాటు మరింత ఎక్కువవుతుంది, ఎందుకంటే ఆ సమయానికి శరీరం, మనస్సు అలసిపోయి ఆలోచనా శక్తి తగ్గుతుంది.
ఈ అలవాటు బారిన పడుతున్నారని చెప్పే సంకేతాలను ఓసారి పరిశీలిస్తే.. పడుకునే ముందు ఫోన్ స్క్రోల్ చేసే అలవాటు మీరు అనుకున్న సమయం కంటే చాలా ఎక్కువ సేపు సాగుతుంది. ఒకవేళ మీ “ఐదు నిమిషాలు” గంటగా మారుతుంటే.. నిద్రపోయే ముందే ఫోన్ ఉపయోగించడానికి ఒక నిర్దిష్ట సమయాన్ని కేటాయించుకోండి.
తాజా సమాచారం తెలుసుకోవడం మంచిదే అనిపించినప్పటికీ, నిరంతరం వచ్చే అప్‌డేట్లు మిమ్మల్ని ప్రశాంతంగా నిద్రపోనివ్వవు. అందుకోసం పగటిపూట మాత్రమే వార్తలు చూసే సమయాన్ని కేటాయించుకోండి. పడుకునేటప్పుడు ఫోన్ మీ పక్కనే ఉంటే, దాన్ని స్క్రోల్ చేయడం చాలా సులభమవుతుంది. అందుకే ఫోన్‌ను మీకు అందుబాటులో లేని దూరంలో ఛార్జింగ్ పెట్టండి. నిద్ర లేవడానికి ఫోన్ అలారంకి బదులుగా సాధారణ క్లాక్/అలారం వాడటం మంచిది.
Also Read:దుబాయ్ బతుకమ్మ వేడుకలకు కేటీఆర్‌
చాలా అలసిపోయినప్పటికీ, సోషల్ మీడియాలో వచ్చే కొత్త విషయాల (Novelty) పట్ల ఆసక్తి వల్ల స్క్రోలింగ్ ఆపడం కష్టమవుతుంది. ఈ అలవాటును నివారించడానికి రాత్రి త్వరగా ఫోన్ పక్కన పెట్టి పుస్తకాలు చదవడం, ప్రశాంతమైన సంగీతం వినడం లేదా ప్రశాంతమైన నిద్రకు సహకరించే పద్ధతులను అలవాటు చేసుకోండి.
భయాందోళన కలిగించే అప్‌డేట్లు, వివాదాలు లేదా ఒత్తిడిని పెంచే పోస్టులను పదే పదే చూడటమే డూమ్‌స్క్రోలింగ్. రాత్రి వేళల్లో ఇది మీ అలసిపోయిన మెదడును మరింత మేల్కొని ఉండేలా చేస్తుంది. కాబట్టి వార్తలు చూడాలనుకుంటే పగటిపూట చూసి, రాత్రి వేళల్లో దానికి దూరంగా ఉండండి.