తెలంగాణలో స్థానిక సంస్థల ఎన్నికల నిర్వహణకు సంబంధించి ప్రభుత్వం మరోసారి కసరత్తు ప్రారంభించింది. ఎన్నికల నిర్వహణపై పూర్తిస్థాయిలో ఒక నోట్ను తయారు చేయాలని పంచాయతీరాజ్ శాఖ అధికారులను ప్రభుత్వం ఆదేశించింది.
స్థానిక సంస్థల ఎన్నికల నిర్వహణపై హైకోర్టు ఇచ్చిన ఆదేశాల నేపథ్యంలో రాష్ట్ర ప్రభుత్వంపై ఒత్తిడి పెరిగింది. ఈ నెల 24వ తేదీలోగా ఎన్నికల నిర్వహణపై ప్రభుత్వ నిర్ణయాన్ని తెలియజేయాలని హైకోర్టు స్పష్టం చేసింది. అంతేకాకుండా, రిజర్వేషన్లు ఖరారు చేయడం, ఎన్నికల నిర్వహణ తేదీలను వెల్లడించడం వంటి అంశాలను కూడా కోర్టుకు సమర్పించాలని ఆదేశించింది.
హైకోర్టు ఆదేశాల నేపథ్యంలో, ఈ నెల 17న జరగబోయే రాష్ట్ర మంత్రివర్గ సమావేశం (కేబినెట్ భేటీ)లో స్థానిక సంస్థల ఎన్నికల నిర్వహణ అంశంపై ప్రధానంగా చర్చించే అవకాశం ఉందని తెలుస్తోంది. కేబినెట్ నిర్ణయం తీసుకున్న తర్వాత, ఆ వివరాలను హైకోర్టుకు సమర్పించే అవకాశం ఉంది. రాష్ట్రంలో స్థానిక సంస్థల పాలకవర్గాల గడువు ముగిసినందున, హైకోర్టు ఆదేశాల మేరకు ప్రభుత్వం ఈ ప్రక్రియను వేగవంతం చేసింది.
Also Read:ఏపీలో మరో భారీ పెట్టుబడి