ఆంధ్రప్రదేశ్లో పంచాయతీల విభజన, విలీన ప్రక్రియను తాత్కాలికంగా వాయిదా వేయాలని రాష్ట్ర ప్రభుత్వం నిర్ణయించినట్లు సమాచారం. గ్రామపంచాయతీల పాలకవర్గాల పదవీకాలం ముగిసే వరకు ఇలాంటి విభజన లేదా విలీన చర్యలు చేపట్టే అవకాశం లేకుండా గతంలోనే పంచాయతీరాజ్ చట్టంలో సవరణలు చేసిన విషయం తెలిసిందే. ఈ నిబంధనల నేపథ్యంలో తాజా నిర్ణయం తీసుకున్నట్లు తెలుస్తోంది.
ప్రస్తుతం పంచాయతీల విభజన, విలీనానికి సంబంధించి పలు కేసులు కోర్టుల్లో పెండింగ్లో ఉన్నాయనే అంశాన్ని ప్రభుత్వం సీరియస్గా పరిగణించినట్లు సమాచారం. న్యాయపరమైన చిక్కులు తలెత్తకుండా ఉండేందుకు, అలాగే కోర్టు తీర్పులను గౌరవిస్తూ ముందుకెళ్లాలనే ఉద్దేశంతో విభజన ప్రక్రియను నిలిపివేయాలని రాష్ట్ర పంచాయతీరాజ్, గ్రామీణాభివృద్ధి శాఖ నిర్ణయానికి వచ్చినట్లు తెలిసింది. ఈ నిర్ణయం వల్ల గ్రామస్థాయిలో ఏర్పడుతున్న గందరగోళం కొంత మేరకు తగ్గే అవకాశం ఉందని అధికారులు భావిస్తున్నారు.
పంచాయతీల విభజన, విలీనంపై స్పష్టత లేకపోవడంతో గ్రామాల మధ్య వివాదాలు, పరిపాలనా ఇబ్బందులు తలెత్తుతున్న నేపథ్యంలో ఈ నిర్ణయం కీలకంగా మారింది. తాత్కాలికంగా ఈ ప్రక్రియను వాయిదా వేయడం ద్వారా పరిపాలనపై దృష్టి కేంద్రీకరించవచ్చని ప్రభుత్వం భావిస్తోంది.
ఈ అంశంపై ఒకటి లేదా రెండు రోజుల్లో అధికారిక ఉత్తర్వులు జారీ చేసే అవకాశం ఉందని సంబంధిత వర్గాలు వెల్లడిస్తున్నాయి. ఉత్తర్వులు వెలువడిన అనంతరం పంచాయతీల విభజన, విలీనంపై స్పష్టమైన దిశానిర్దేశం లభించనుంది. ఈ నిర్ణయం గ్రామపంచాయతీల ప్రతినిధులు, గ్రామస్తుల్లో ఆసక్తిగా మారింది.
Also Read:KTR:ఫిరాయింపు ఎమ్మెల్యేలకు డోర్స్ క్లోజ్