తెలంగాణ రాష్ట్ర ఎన్నికల కమిషన్ కీలక సర్క్యులర్ విడుదల చేసి ఎక్స్ అఫీషియో సభ్యుల అర్హతలపై స్పష్టత ఇచ్చింది. మున్సిపల్ సంస్థల్లో ఎక్స్ అఫీషియో సభ్యులుగా కొనసాగాలంటే సంబంధిత మున్సిపల్ పరిధిలో ఓటర్గా నమోదు అయి ఉండటం తప్పనిసరి అని పేర్కొంది. కేవలం పదవి ఆధారంగా ఓటు హక్కు ఉండదని స్పష్టం చేసింది.
సర్క్యులర్ ప్రకారం, లోక్సభ సభ్యులు (ఎంపీలు) మరియు ఎమ్మెల్యేలు తమకు సంబంధించిన మున్సిపల్ ప్రాంతంలో ఓటర్గా రిజిస్ట్రేషన్ కలిగి ఉంటేనే ఎక్స్ అఫీషియో సభ్యులుగా అర్హత పొందుతారు. అదే విధంగా రాజ్యసభ ఎంపీలు, ఎమ్మెల్సీలు కూడా సంబంధిత మున్సిపాలిటీ పరిధిలో ఓటర్ జాబితాలో పేరు నమోదు చేసుకుని ఉండాలి. లేనిపక్షంలో వారికి ఓటు హక్కు ఉండదని ఎన్నికల కమిషన్ స్పష్టం చేసింది.
ఈ నిర్ణయం మున్సిపల్ పరిపాలనలో పారదర్శకతను పెంచే దిశగా తీసుకున్నదిగా అధికారులు పేర్కొంటున్నారు. అర్హతలేని సభ్యులు ఓటింగ్ ప్రక్రియలో పాల్గొనకుండా చర్యలు తీసుకోవాలని రాష్ట్రవ్యాప్తంగా కలెక్టర్లు, మున్సిపల్ కమిషనర్లకు ఆదేశాలు జారీ చేశారు.
ఇకపై మున్సిపల్ సమావేశాల్లో ఎక్స్ అఫీషియో సభ్యుల ఓటు హక్కుపై ఎలాంటి అనుమానాలు లేకుండా స్పష్టమైన మార్గదర్శకాలు అమలులోకి రానున్నాయి. ఈ సర్క్యులర్ రాష్ట్ర రాజకీయాల్లో చర్చనీయాంశంగా మారింది.
Also Read:పచ్చి కూరగాయలు తింటున్నారా?