విశాఖ వేదికగా భారత్ – దక్షిణాఫ్రికా మధ్య మూడో టీ20 జరగనున్న సంగతి తెలిసిందే. ఇందుకోసం వైజాగ్ చేరుకున్న భారత క్రికెటర్లు కాసేపు బీచ్‌లో సేదతీరారు. కొందరు ఆటగాళ్లు సముద్రంలోకి దిగి స్నానం చేశారు. స్ధానిక ప్రజలు ఆటగాళ్లను చూసేందుకు, వారితో కలిసి ఫోటోలు దిగేందుకు భారీగా తరలివచ్చారు.
రెండు టీ20ల్లో ఓడిన భారత్‌కు.. విశాఖ మ్యాచ్ కీలకం కానుంది. ఈ మ్యాచ్‌లో గెలిస్తేనే భారత్ సిరీస్‌ను గెలిచే అవకాశాలు ఉంటాయి. ఒకవేళ ఓడితే మాత్రం సిరీస్ సఫారీల వశం అవుతుంది.
స్టార్ ఆటగాళ్లు విరాట్ కోహ్లి, రోహిత్ శర్మ, జస్ప్రీత్ బుమ్రా ఆడటం లేదు. దీంతో రిషబ్ పంత్‌కు నాయకత్వ పగ్గాలు అప్పగించారు. అయితే భారత్ సమిష్టి వైఫల్యం కారణంగా అంచనాలకు తగ్గట్టుగా రాణించలేకపోతోంది. దీంతో పెద్ద ఎత్తున విమర్శలు వస్తున్న తరుణంలో విశాఖ టీ20లో గెలిచి వాటికి పుల్ స్టాప్ పెట్టాలని పంత్ సేన భావిస్తోంది.
