భారత క్రికెట్ జట్టు చీఫ్ సెలెక్టర్‌గా తన కాంట్రాక్ట్ అక్టోబర్ 4తో ముగియనుండటంతో పదవీకాల పొడిగింపును కోరకూడదని అజిత్ అగార్కర్ నిర్ణయించుకున్నారు. రోహిత్ శర్మ ఎంపిక విషయంలో బోర్డుతో వచ్చిన అభిప్రాయ భేదాలే ఈ నిర్ణయానికి కారణమని వార్తలు వస్తున్నాయి. ఇది 2027 వన్డే ప్రపంచ కప్‌కు ముందు కాస్త అనిశ్చితికి దారితీసింది. అయితే ఈ సమస్యను 15 రోజుల్లో పరిష్కరిస్తామని బిసిసిఐ కార్యదర్శి దేవజిత్ సైకియా భావిస్తున్నారు.
2027 వన్డే ప్రపంచ కప్ వరకు తనను పదవిలో కొనసాగించే ఆలోచన బోర్డుకు ఉందో లేదో తెలుసుకోవడానికి గత కొన్ని నెలలుగా అగార్కర్ బిసిసిఐ ఉన్నతాధికారులతో చర్చలు జరిపారు. చివరకు అక్టోబర్ 4 తర్వాత తాను ఈ పదవిలో కొనసాగలేనని ఈ వారంలో బిసిసిఐకి స్పష్టం చేశారు.
శుక్రవారం ముంబైలో జరిగిన బిసిసిఐ వార్షిక సర్వసభ్య సమావేశం (AGM) అనంతరం బిసిసిఐ కార్యదర్శి దేవజిత్ సైకియా మాట్లాడుతూ, అగార్కర్ భవిష్యత్తుపై బోర్డు ఇంకా ఏ నిర్ణయమూ తీసుకోలేదని తెలిపారు. “మాకు ఇంకా 15 రోజుల సమయం ఉంది. క్రికెట్ ప్రపంచంలో 15 రోజులు అనేది చాలా పెద్ద సమయం. తగిన సమయంలో సరైన నిర్ణయం తీసుకుంటాం” అని ఆయన పేర్కొన్నారు.
అగార్కర్ జూలై 2023లో చీఫ్ సెలెక్టర్‌గా బాధ్యతలు స్వీకరించారు. ఆయన నాయకత్వంలో భారత్ 2023, 2025 ఆసియా కప్‌లు, 2024, 2026 టి20 ప్రపంచ కప్‌లు మరియు 2025 ఛాంపియన్స్ ట్రోఫీలను కైవసం చేసుకుంది. అంతేకాకుండా, 2023 వన్డే ప్రపంచ కప్ ఫైనల్‌కు కూడా భారత్ చేరింది.
Also Read:‘ది ప్యారడైజ్’..ఎంజాయ్ చేస్తారు
మరోవైపు డిసెంబర్ రెండో వారంలో ఐపిఎల్ 2027 మినీ వేలం నిర్వహించేందుకు బిసిసిఐ సన్నాహాలు చేస్తోంది. 2023-27 సైకిల్‌లో ఇది చివరి మినీ వేలం కానుంది. అలాగే, ఐపిఎల్ గవర్నింగ్ కౌన్సిల్‌కు అరుణ్ ధుమాల్, ఖైరుల్ మజుందార్‌లను బిసిసిఐ తిరిగి ఎన్నుకుంది.