అతను ఉపాధ్యాయుడే..కానీ బాలికలకు పాఠాలు చెప్పాల్సిందిపోయి…నీచానికి ఒడిగట్టాడు. అస్సాం రాష్ట్రానికి చెందిన ఓ టీచర్ తన వద్ద చదువుకునే మైనర్ బాలికతో అసభ్యంగా ప్రవర్తించిన విషయం పెద్ద వివాదాస్పదమైంది.
ఈ సందర్భంగా ఆ బాలికతో వివిధ రకాల భంగిమల్లో ఉన్న ఫోటోలు ఇపుడు సోషల్ మీడియాలో వైరల్‌గా మారాయి.
అసోం రాష్ట్రంలోని హైలాకంది జిల్లా కట్లిచెర్రా పట్టణానికి చెందిన ఫైజుద్దీన్ లస్కర్ అనే ఉపాధ్యాయుడు తరగతి గదిలోనే బాలికలతో కలిసి అభ్యంతరకరంగా ఫోటోలు దిగాడు.
ఉపాధ్యాయుడు బాలికలను ఆలింగనం చేసుకోవడంతోపాటు అసభ్య భంగిమలతో ఫోటోలు దిగాడని పోలీసుల దర్యాప్తులో తేలింది.
ఉపాధ్యాయుడు ఫైజుద్దీన్ లష్కర్ ఓ బాలికను పెళ్లాడాలని అనుకున్నారు. ఇంతలో బాలిక తల్లిదండ్రులు వేరే యువకుడితో పెళ్లి నిశ్చయించారు.
దీంతో ఉపాధ్యాయుడు ఫైజుద్దీన్ పెళ్లి చెడగొట్టేందుకు తాను బాలికలతో దిగిన ఫోటోలన్నీమరో వ్యక్తి సాయంతో సోషల్ మీడియాలో పెట్టించాడని జిల్లా ఎస్పీ గోస్వామి చెప్పారు.
కీచక ఉపాధ్యాయుడిపై ఐపీసీ సెక్షన్ 192, సెక్షన్ 67, ఐటీ యాక్టు సెక్షన్ 8, పోస్కో చట్టాల కింద కేసు నమోదు చేసి, నిందితుడిని అరెస్టు చేసి జైలుకు పంపించామని ఎస్పీ గోస్వామి వివరించారు. ఇదిలా ఉంటే.. కీచక టీచర్ నెట్టింట్లో పెట్టిన ఫోటోలు మాత్రం ఇపుడు వైరల్‌గా మారాయి.
