మెగాస్టార్ చిరంజీవి హీరోగా సురేందర్ రెడ్డి దర్శకత్వంలో తెరకెక్కిన చిత్రం సైరా. ఉయ్యాలవాడ నరసింహరెడ్డి జీవిత చరిత్ర ఆధారంగా తెరకెక్కిన ఈ చిత్రంలో బాలీవుడ్,మళయాల,తమిళ సినీరంగాలకు చెందిన ప్రముఖులు నటించగా కొణిదెల ప్రొడక్షన్స్‌ బ్యానర్‌పై రామ్ చరణ్ నిర్మిస్తున్నారు. ఇటీవలె సెన్సార్ కార్యక్రమాలను పూర్తి చేసుకున్న ఈ చిత్రం సింగిల్ కట్ లేకుండా యు/ఏ సర్టిఫికేట్ పొందింది. అక్టోబర్ 2న సినిమా ప్రేక్షకుల ముందుకురానుంది.
తాజాగా సినిమాకు సంబంధించి మరో అప్ డేట్ వచ్చేసింది. తెలుగు సినిమా ట్రెండ్‌ను పక్కనపెట్టి కేవలం ఈ సినిమాలో రెండు పాటలే ఉండనున్నాయట. ఈ విషయాన్ని దర్శకుడు సురేందర్ రెడ్డి స్పష్టం చేశారు. అయితే ఆడియోలో మాత్రం ఆరు పాటలు ఉంటాయని వాటిని కేవలం ప్రమోషన్స్‌ కోసమే ఉపయోగించామని చెప్పారు.
అమిత్ త్రివేది ఈ పాటలను కంపోజ్ చేశారని సురేందర్ రెడ్డి చెప్పారు. స్వాతంత్ర్య సమరయోధుడి చరిత్రకు సంబంధించిన సినిమా కావడంతో ఎక్కువ పాటలు,రొటిన్ డ్యాన్స్ ఉండకుండా జాగ్రత్త తీసుకున్నారట సురేందర్ రెడ్డి. మొత్తంగా చిరు సినిమా కెరీర్‌లోనే కేవలం రెండు పాటలే ఉన్న మూవీ సైరా. ఇప్పటికే సైరా టైటిల్‌ సాంగ్ రిలీజై అందరిని ఆకట్టుకోగా సినిమాలో ఉన్న ఆ రెండో సాంగ్ ఏంటోనన్న ఆసక్తి అందరిలో నెలకొంది.
