తో పాటు మరికొన్ని){kind=link}
ఆన్లైన్ ఫుడ్ డెలివరీ సంస్థ స్విగ్గీకి బెంగళూరులో పెద్ద ఎదురుదెబ్బ తగిలే అవకాశం ఉంది. బెంగళూరు హోటల్స్ అసోసియేషన్ (BHA)తో పాటు మరికొన్ని ఆతిథ్య (హాస్పిటాలిటీ) రంగానికి చెందిన సంస్థలు ఆగస్టు 15 నుండి స్విగ్గీ ప్లాట్ఫామ్ ద్వారా ఆర్డర్లను స్వీకరించడం నిలిపివేస్తామని హెచ్చరించాయి. ఆర్థిక పరమైన అక్రమాలు, చెల్లింపుల్లో పారదర్శకత లేకపోవడం, అనధికారికంగా డబ్బులు కట్ చేయడం మరియు ప్రకటనల పేరిట అదనపు ఛార్జీలు వసూలు చేయడం వంటి ఆరోపణలను హోటల్ అసోసియేషన్ స్విగ్గీపై చేసింది.
చర్చల ద్వారా తమ ఆందోళనలను పరిష్కరించుకోవడానికి స్విగ్గీకి చివరి అవకాశం ఇచ్చినట్లు అసోసియేషన్ తెలిపింది. స్వాతంత్ర్య దినోత్సవానికి ముందు కంపెనీ దిద్దుబాటు చర్యలు తీసుకోకపోతే బెంగళూరులోని సభ్య హోటళ్లన్నీ ఏకగ్రీవంగా స్విగ్గీతో వ్యాపారాన్ని నిలిపివేయాలని నిర్ణయించినట్లు ఆ ప్రకటనలో పేర్కొన్నారు. ఇది విఫలమైతే ఆగస్టు 15 నుండి స్విగ్గీతో ఉన్న అన్ని వ్యాపార సంబంధాలను నిలిపివేయాలని బెంగళూరులోని మా అసోసియేషన్లన్నీ ఏకగ్రీవంగా నిర్ణయించాయి అని అసోసియేషన్ తెలిపింది.
రెస్టారెంట్ యజమానుల ముందస్తు అనుమతి లేకుండానే ప్రమోషనల్ మరియు అడ్వర్టైజింగ్ ఖర్చులను కట్ చేస్తున్నారని అసోసియేషన్ ఆరోపించింది. BHA తెలిపిన వివరాల ప్రకారం… రాతపూర్వక లేదా డిజిటల్ సమ్మతి తీసుకోకుండానే స్విగ్గీ రెస్టారెంట్లను కాస్ట్ పర్ క్లిక్ , కాస్ట్ పర్ అక్విజిషన్ మరియు ప్రమోటెడ్ అడ్వర్టైజ్మెంట్ క్యాంపెయిన్లలో చేర్చుతోందని ఆరోపించారు. ఎలాంటి అదనపు ఛార్జీలు లేకుండా ఇటువంటి ప్రమోషనల్ క్యాంపెయిన్ల నుండి బయటకు రావడానికి రెస్టారెంట్లకు సింగిల్-క్లిక్ ఆప్షన్ ఇవ్వాలని అసోసియేషన్ డిమాండ్ చేసింది. పెయిడ్ ప్రమోషన్లలో పాల్గొనాలా వద్దా అనే అంశంపై వ్యాపారాలకే పూర్తి నియంత్రణ ఉండాలని తెలిపింది.
Also Read:ఈ ప్రభుత్వాన్ని మార్చేస్తాం:అభిజిత్
వినియోగదారుల నుండి వసూలు చేసిన జీఎస్టీ మొత్తాన్ని ప్రభుత్వానికి జమ చేయడానికి ముందే ఆ మొత్తంపై కూడా సర్వీస్ ఛార్జీలు విధించడంపై BHA అభ్యంతరం వ్యక్తం చేసింది. స్విగ్గీ సేవలను నిలిపివేసే నిర్ణయం తీసుకున్నా వినియోగదారులకు ఎలాంటి అసౌకర్యం కలగకుండా చూస్తామని అసోసియేషన్ తెలిపింది. వినియోగదారులకు సేవలు అందించడానికి సభ్య రెస్టారెంట్లు వీలైనంతవరకు ప్రత్యామ్నాయ ఏర్పాట్లను అన్వేషిస్తాయని వెల్లడించింది. ప్రస్తుతం ఈ ఆరోపణలపై లేదా బహిష్కరణ హెచ్చరికపై స్విగ్గీ నుండి అధికారిక స్పందన ఇంకా వెలువడలేదు.