గుడ్ న్యూస్..గత వారం రోజులుగా సుయజ్ కాలువలో అడ్డంగా ఇరుక్కుపోయిన ఎవర్ గివెన్ నౌక కదిలింది.ప్రపంచంలో అత్యంత రద్దీగా ఉండే జల మార్గం సూయజ్ కెనాల్‌లో భారీ నౌక కొద్దిగా కదిలినట్లు అధికారులు ప్రకటించారు. ఈ మానవ నిర్మిత కాలువలో ఆరు రోజుల నుంచి చిక్కుకున్న ఎవర్ గివెన్ నౌక ప్రయాణం మళ్ళీ ఎప్పుడు ప్రారంభమవుతుందో చెప్పలేమన్నారు. మెడిటెర్రేనియన్ సముద్రం, ఎర్ర సముద్రం మధ్య అనుసంధానం కోసం ఈ కాలువను నిర్మించారు.
త్వ‌ర‌లోనే సుయెజ్ కాలువను తిరిగి తెరిచే అవ‌కాశాలు క‌నిపిస్తున్నాయి. ఈ షిప్ వ‌ల్ల ఇప్పటికే కాలువలో అటుఇటూ కొన్ని వంద‌లాది నౌక‌లు నిలిచిపోయాయి.షిప్ ట్రాకింగ్ స‌ర్వీస్ అయిన వెసెల్‌ఫైండ‌ర్ సుయెజ్ కాలువ‌లోని ఎవర్ గివెన్ షిప్ స్టేట‌స్‌ను మార్చింది. గత మంగ‌ళ‌వారం 400 మీట‌ర్ల పొడువున్న ఈ షిప్ సుయెజ్ కాలువలో అడ్డంగా ఇరుక్కుపోయిన విష‌యం తెలిసిందే. ఈదురు గాలుల కార‌ణంగా ఈ షిప్ అడ్డం తిరిగింది. ఇప్పటికే లక్షల కోట్లలో నష్టం వాటిల్లింది.
ఈజిప్టు సమీపంలో మద్యధరా సముద్రం, ఎర్ర సముద్రాలను కలిపే ఈ కాలువ.. ప్రపంచంలోనే అత్యంత రద్దీగా ఉండే వాణిజ్య మార్గాల్లో ఒకటి. కాగా, 193 కిలోమీటర్ల పొడవైన సూయజ్ కాలువ ద్వారా మధ్యప్రాశ్చం నుంచి ఆసియా, ఐరోపా, ఉత్తర అమెరికా దేశాలకు ఆయిల్ ట్యాంకర్ల రాకపోకలు సాగుతుంటాయి. ప్రపంచ వాణిజ్యంలో 12 శాతం సరకు రవాణా ఈ కాలువ ద్వారానే జరుగుతుంది. ఈ మార్గం ద్వారా ప్రతిరోజూ దాదాపు 10 లక్షల బ్యారెల్స్ చమురు సరఫరా అవుతోంది.
