టీజ‌ర్ వాయిదా !

సూప‌ర్ స్టార్ మ‌హేష్ బాబు, త‌మిళ ద‌ర్శ‌కుడు మురుగ‌దాస్ కాంబినేష‌న్ లో వస్తున్న చిత్రం స్పైడ‌ర్. ఈ చిత్రానికి సంబంధించిన ఫస్ట్‌లుక్‌ ఏప్రిల్‌లో విడుదల చేసినప్పటికీ.. టీజర్ను విడుదల చేయడంలో స్పైడర్ టీం ఆలస్యం చేసింది. మరోవైపు క్లైమాక్స్‌ రీషూట్ కోసం సినిమా విడుదల కూడా ఆలస్యం అవుతూనే ఉంది. స్పైడర్ చిత్రాన్ని దసరా కానుకగా విడుదల చేస్తామని తన ట్విట్టర్ ద్వారా తెలిపిన ప్రిన్స్ , టీజర్ ని మే 31 సాయంత్రం 5 గంటలకు రిలీజ్ చేస్తామని ట్వీటు చేసిన సంగతి తెలిసిందే. తాజాగా ఈ సినిమా టీజర్ మరోసారి విడుదల వాయిదాపడింది.

ద‌ర్శ‌క ర‌త్న దాసరి మృతికి సంతాప సూచ‌కంగా చిత్ర టీజ‌ర్ విడుద‌ల‌ని వాయిదా వేశారు. జూన్ 1 ఉద‌యం 10.30ని.ల‌కు విడుద‌ల చేస్తున్న‌ట్టు ప్ర‌క‌టించారు. మ‌రో వైపు సూప‌ర్ స్టార్ కృష్ణ కూడా త‌న బ‌ర్త్ డే వేడుక‌ల‌కి దూరంగా ఉన్నాడు. దాస‌రి మృతి పట్ల సినీనటుడు మ‌హేశ్ బాబు తీవ్ర దిగ్భ్రాంతి వ్య‌క్తం చేశాడు. దాస‌రి మ‌ర‌ణ‌వార్త‌ను తెలుసుకొని షాక్‌కు గుర‌య్యాన‌ని, ఎంతో బాధ క‌లిగించింద‌ని త‌న ట్విట్ట‌ర్ ఖాతాలో పేర్కొన్నాడు. చిత్ర ప‌రిశ్ర‌మ‌లో ఆయ‌న లేని లోటు ఎప్ప‌టికీ, ఎవ్వ‌రూ భ‌ర్తీ చేయ‌లేర‌ని అన్నాడు. ఆయ‌న ఆత్మ‌కు శాంతి క‌ల‌గాల‌ని కోరుకుంటున్న‌ట్లు పేర్కొన్నాడు. దాసరి మృతి ప‌ట్ల తెలుగు సినీ ప‌రిశ్ర‌మ‌లోని ప్ర‌ముఖులు సంతాపం వ్య‌క్తం చేస్తున్నారు. ఆయ‌నతో త‌మకున్న అనుబంధాన్ని గుర్తు చేసుకుంటున్నారు. స్పైడ‌ర్ చిత్రం ద‌సరా కానుక‌గా సెప్టెంబ‌ర్ 22 న విడుద‌ల కానున్న‌ట్టు స‌మాచారం. మ‌హేష్ బాబుతో పాటు చిత్ర ద‌ర్శ‌కుడు మురుగ‌దాస్ కూడా దాస‌రికి నివాళులు అర్పించారు.