ప్రముఖ నేపథ్య గాయని మంగ్లీ ఇటీవల తనపై వస్తున్న మైక్రో ఫైనాన్స్ ఆరోపణలపై స్పందిస్తూ మరో వీడియోను విడుదల చేశారు. ఈ వివాదంతో తనకు ఎటువంటి సంబంధం లేదని, తన పేరును కొందరు దుర్వినియోగం చేశారని ఆమె ఆవేదన వ్యక్తం చేశారు.
గత కొద్దిరోజులుగా మైక్రో ఫైనాన్స్ వ్యవహారంలో తన పేరు వినిపిస్తుండటంపై సింగర్ మంగ్లీ ఘాటుగా స్పందించారు. ఈ మేరకు ఆమె ఒక వీడియోను విడుదల చేస్తూ, అసలు తనకు ఈ విషయంతో ఎలాంటి సంబంధం లేదని స్పష్టం చేశారు.నేను ఇప్పటి వరకు ఏ తప్పూ చేయలేదు, భవిష్యత్తులో కూడా చేయను. మైక్రో ఫైనాన్స్ అనే పదమే నాకు ఇంతకుముందు తెలియదు. అలాంటిది నన్ను ఈ వివాదంలోకి లాగడం బాధాకరం అని మంగ్లీ పేర్కొన్నారు. తనపై వస్తున్న ఆరోపణల్లో ఎటువంటి నిజం లేదని ఆమె వివరణ ఇచ్చారు.
ఈ వ్యవహారంలో తాను నిందితురాలిని కాదని, నిజానికి తనే ఒక బాధితురాలినని ఆమె సంచలన వ్యాఖ్యలు చేశారు. కొందరు వ్యక్తులు తన పాపులారిటీని, తన పేరును వాడుకుని అమాయక బాధితులను మోసం చేశారని ఆమె ఆరోపించారు. తన ప్రమేయం లేకుండా తన పేరును వాడుకున్న వారిపై ఆమె ఆగ్రహం వ్యక్తం చేశారు.
ALso Read:దక్షిణాదికి అన్యాయం జరగకూడదు:గుత్తా
ఈ ప్రచారం వల్ల నేను, నా కుటుంబ సభ్యులు తీవ్రమైన మానసిక క్షోభకు గురవుతున్నాం. లేనిపోని నిందలు వేస్తూ మమ్మల్ని ఇబ్బంది పెట్టడం సరికాదు” అని ఆమె ఆవేదన చెందారు. సెలబ్రిటీల పేర్లు వాడుకుని జరిగే మోసాల పట్ల ప్రజలు కూడా జాగ్రత్తగా ఉండాలని ఆమె సూచించారు.