అందాల తార శ్రుతిహాసన్ ఇప్పటి వరకు వెండి తెర మీద జిగేల్ అనిపించింది. కొంతకాలంగా నటనకు దూరంగా ఉంటున్న ఈ సుందరి లండన్‌లో రాక్‌స్టార్‌గా కొత్త అవతారం ఎత్తారు. తన పాటలతో సంగీత ప్రియులను ఆకట్టుకొన్నారు. ఇటీవల లండన్‌లోని పాపులర్ రెస్టారెంట్‌ నెడ్‌లో ఆలపించిన పాప్ సాంగ్ ఆడియెన్స్‌ను ఊర్రూతలూగించింది. శ్రుతిహాసన్ ఇదివరకే విదేశాల్లో పలు షోలలో ప్రదర్శన ఇచ్చిన సంగతి తెలిసిందే.
శ్రుతి తాను రూపొందించిన ‘ఒరిజినల్‌ నంబర్‌’ ఆల్బమ్‌లోని పాటలతో ఈ ప్రదర్శన ఇచ్చారు. త్వరలో ఇది విడుదల కాబోతోందట. ఈ సందర్భంగా శ్రుతి ట్వీట్‌ చేశారు. కార్యక్రమానికి వచ్చిన వారందరికీ ధన్యవాదాలు తెలిపారు. షోకు సంబంధించిన ఫొటోలు ప్రస్తుతం సోషల్‌మీడియాలో చక్కర్లు కొడుతున్నాయి.
శ్రుతి స్వరం ఎంతో బాగుందని నెటిజన్లు కామెంట్లు చేస్తున్నారు. శ్రుతి ‘కాటమ రాయుడు’, ‘బెహెన్‌ హోగీ తెరి’ సినిమాల్లో 2017లో చివరిసారి వెండితెరపై కనిపించారు. దీని తర్వాత కొత్త ప్రాజెక్టుకు సంతకం చేయలేదు. ప్రస్తుతం శ్రుతి ‘శభాష్‌నాయుడు’ చిత్రంలో నటిస్తున్నారు.
