పొడుగుకాళ్ల సుందరి దీపికా పదుకొనె.. ప్రస్తుతం బాలీవుడ్‌లో టాప్‌ పొజిషన్‌లో ఉన్న క్రేజీ హీరోయిన్. హాలీవుడ్‌లో ‘త్రిఫుల్‌ ఎక్స్’ చిత్రంలోనూ నటిస్తూ తనకంటూ ఓ ప్రత్యేక గుర్తింపు కోసం ప్రయత్నిస్తోంది. ఇటీవలే త్రిఫుల్‌ ఎక్స్ సినిమా షూటింగ్ పూర్తి చేసుకొని ఇండియాకు వచ్చింది. ప్రస్తుతం ప్రముఖ ఇరానియన్‌ దర్శకుడు మజిద్‌మజిదీ దీపికా కథానాయికగా ఓ చిత్రం తెరకెక్కిస్తున్నారు.
ఈ సినిమా కోసం అభిమానులు గుర్తుపట్టలేని విధంగా తయారైంది దీపికా. తన గ్లామర్‌తో ఫ్యాన్స్‌ను ఫిదా చేసే ఈ భామ ఈ చిత్రంలో డీగ్లామర్‌గా కనిపించనున్నట్లు తెలుస్తోంది. ఈ ఫొటోల్లో దీపిక ఓ బస్తీలో సంచి పట్టుకుని, అత్యంత పేద అమ్మాయిలా కనిపిస్తోంది. ఆన్‌లైన్‌లో హల్ చల్ చేస్తున్న ఈ ఫోటోలు లోకేషన్ టెస్ట్‌ కోసం ఈ షూట్ జరుపుతుండగా తీసినట్టు తెలుస్తోంది. ఈ సినిమా షూటింగ్ అంతా పూర్తిగా ముంబై, డిల్లీ, కాశ్మీర్, రాజస్థాన్‌ మరియు ఉత్తర్‌ ప్రదేశ్‌లో జరుపుకోనున్నట్లు టాక్. కాగా, ఈ సినిమాకు సంబంధించిన పూర్తి సమాచారం ఇంకా ప్రకటించలేదు.
దీపిక ఈ చిత్రంతో పాటు సంజయ్‌లీలా భన్సాలీ ప్రతిష్ఠాత్మకంగా తెరకెక్కిస్తున్న ‘పద్మావతి’ చిత్రంలో నటిస్తోంది. ఇందులో రణ్‌వీర్‌ సింగ్‌, షాహిద్‌ కపూర్‌ ప్రధాన పాత్రలు పోషిస్తున్నారు. కాగా, దీపికా తొలి హాలీవుడ్‌ చిత్రం ‘ట్రిపులెక్స్‌’ వచ్చే ఏడాది జనవరి 20న ప్రేక్షకుల ముందుకు రానుంది.
