తెలుగు సినీ పరిశ్రమను, ప్రేక్షకులను తీవ్ర దిగ్భ్రాంతికి గురిచేసిన ‘పుష్ప-2’ ప్రీమియర్ షో తొక్కిసలాట కేసు విచారణను హైదరాబాద్లోని నాంపల్లి కోర్టు జూలై 6వ తేదీకి వాయిదా వేసింది. ఈ రోజు జరిగిన కోర్టు విచారణకు ఐకాన్ స్టార్, టాలీవుడ్ నటుడు అల్లు అర్జున్ మినహా ఈ కేసుతో సంబంధం ఉన్న మిగిలిన నిందితులంతా న్యాయస్థానం ముందు హాజరయ్యారు.
2024 డిసెంబర్లో ‘పుష్ప-2’ సినిమా విడుదలైన సమయంలో హైదరాబాద్లోని ఆర్టీసీ క్రాస్ రోడ్స్లో గల సంధ్య థియేటర్ వద్ద భారీ ఉద్రిక్తత, తొక్కిసలాట చోటుచేసుకున్న సంగతి తెలిసిందే. అభిమానులు, ప్రేక్షకులు భారీ సంఖ్యలో తరలిరావడంతో జరిగిన ఈ దురదృష్టకర ఘటనలో ఒకరు మృతి చెందారు. ఈ ప్రమాదానికి సంబంధించి నమోదైన కేసులో పోలీసులు హీరో అల్లు అర్జున్ను ఏ-11 (A11) నిందితుడిగా చేర్చారు.
ఈ రోజు విచారణ సందర్భంగా అల్లు అర్జున్ కోర్టుకు హాజరుకాకపోగా మిగిలిన నిందితులు న్యాయమూర్తి ముందు హాజరయ్యారు. ఉరుకులు, పరుగుల మధ్య సాగిన నాటి ఘటనకు సంబంధించిన ఆధారాలు, చార్జ్షీట్ అంశాలపై విచారించిన కోర్టు.. తదుపరి విచారణను వచ్చే నెల (జూలై) 6వ తేదీకి వాయిదా వేస్తున్నట్లు ప్రకటించింది.
ALso Read:కాంగ్రెస్ వర్సెస్ శశి థరూర్!