వైవిధ్యమైన చిత్రాలతో దర్శకుడిగా అందరి ప్రశంసలు అందుకుంటున్న క్రియేటివ్ దర్శకుడు సుకుమార్ నిర్మాతగా మారి నిర్మించిన తొలిచిత్రం కుమారి 21 ఎఫ్ ఎంతటి విజయాన్ని సాధించిందో ప్రత్యేకంగా చెప్పనక్కర్లేదు. ఇప్పుడు సుకుమార్ నిర్మాతగా తన సొంత సంస్థలో నిర్మిస్తున్న మరో వైవిధ్యమైన ప్రేమకథా చిత్రం దర్శకుడు. సుకుమార్ రైటింగ్స్ పతాకంపై బీఎన్‌సీఎస్‌పీ విజయ్‌కుమార్, థామస్‌రెడ్డి ఆదూరి, రవిచంద్ర సత్తిలతో కలిసి సుకుమార్ ఈ చిత్రాన్ని నిర్మిస్తున్నాడు. అశోక్, ఈషా జంటగా నటిస్తున్నారు. హరిప్రసాద్ జక్కా దర్శకత్వం వహిస్తున్నారు. ప్రస్తుతం నిర్మాణానంతర పనులను జరుపుకుంటోన్న ఈ చిత్రాన్ని ఆగస్టు 4న విడుదల చేయడానికి సన్నాహాలు చేస్తున్నారు.
ఈ చిత్రంలోని పాటలు, స్పెషల్ వీడియోలను సరికొత్తగా విడుదల చేస్తూ వస్తున్నాడు సుకుమార్. ఇప్పటికే ఈ చిత్ర స్పెషల్ వీడియోని దర్శకుడు సురేందర్ రెడ్డి విడుదల చేయగా తొలి పాటను ‘ఆకాశం దించి మేఘాల్లో సెట్‌ వేస్తా..’ ను హీరోయిన్ రకుల్‌ప్రీత్‌ సింగ్‌ లాంఛ్ చేసింది. తాజాగా హీరోయిన్ సమంతా చేతుల మీదుగా మరోపాటను విడదుల చేసేందుకు సన్నాహాలు చేస్తున్నారు. ఆదివారం నుంచి శనివారం అనే సాంగ్ రేపు ఉదయం 10 గంటలకు సమంతా విడుదల చేయనుంది.
ప్రేమకు, తపనకు మధ్య నలిగిపోయే ఓ దర్శకుడి ప్రేమకథగా ఈ సినిమా తెరకెక్కింది. స్వార్థపరుడైన దర్శకుడు ప్రేమలో పడితే ఏం జరుగుతుందనే సినిమాలో ఆసక్తిని రేకెత్తించనుందట. . అశోక్, ఇషా,పూజిత, నోయల్, నవీన్, సుదర్శన్ ప్రధాన పాత్రల్లో నటిస్తున్న ఈ చిత్రానికి సినిమాటోగ్రఫీ: ప్రవీణ్ అనుమోలు, ఎడిటింగ్: నవీన్‌నూలి, సంగీతం: సాయికార్తీక్.
