సమంత అక్కినేని వరుస విజయాలతో దూసుకుపోతుంది. ఈ సంవత్సరం సమంత చేసిన ప్రతి సినిమా బాక్సాఫీస్ దగ్గర దుమ్ము లేపింది. ఈ యేడాది మొదట్లో తన భర్త నాగ చైతన్యతో చేసిన ‘మజిలీ’ సినిమా, రీసెంట్‌గా ఆమె ప్రధాన పాత్రలో వచ్చిన ‘ఓ బేబి’ కూడా బాక్సాఫీస్ దగ్గర అదరగొట్టాయి. ఇటీవలే ‘ఓ బేబి’ సినిమాతో సూపర్ హిట్ అందుకున్న సమంత.. ప్రస్తుతం తమిళ సినిమా 96 తెలుగు రీమేక్‌లో నటిస్తోంది. ఈ సినిమా ఇటీవలే షూటింగ్ పూర్తి చేసుకొని పోస్ట్ ప్రోడక్షన్ పనుల్లో ఉంది.
ఈ విషయాన్ని సమంత తన ఇన్ స్టా గ్రామ్ ద్వారా తెలియజేసింది. “ఇంతవరకూ నేను చేసిన పాత్రలు ఒక ఎత్తు .. ఈ సినిమాలోని ‘జాను’ పాత్ర ఒక ఎత్తు. అందువలన ఈ పాత్రను ఛాలెంజింగ్‌గా తీసుకుని చేశాను. కచ్చితంగా ఇది నా కెరియర్‌లో చెప్పుకోదగిన పాత్ర అవుతుంది. విడుదల తరువాత ఈ సినిమాను చూసిన వాళ్లంతా ఇదే మాట చెబుతారనే నమ్మకం వుంది. ఇంత మంచి టీమ్‌తో కలిసి పనిచేసినందుకు నాకు చాలా సంతోషంగా వుంది” అంటూ చెప్పుకొచ్చింది.
కాగా సామ్‌ అమెజాన్ ప్రైమ్‌లో ప్రసారం అయ్యే ‘ది ఫ్యామిలీ మ్యాన్’ వెబ్ సిరీస్‌ సెకండ్ సీజన్‌లో నటించనున్నట్లు తెలుస్తోంది. ఈ వెబ్ సిరీస్‌ రెండో సీజన్‌లో సమంత మరో ప్రధాన పాత్ర పోషించనుంది. తెలుగు దర్శకులు రాజ్‌ నిడిమోరు, కృష్ణ డీకేలు ఈ వెబ్ సిరీస్‌‌ను దర్శకత్వం వహిస్తున్నారు.
