ఇటీవల హీరోయిన్‌ సాయి పల్లవి వార్తల్లో ఎక్కువగా నిలుస్తోంది. కొద్దిరోజుల క్రితం కశ్మీర్ ఫైల్స్‌పై కామెంట్స్ చేసిన సాయి పల్లవి భారీ ట్రోలింగ్‌కు గురైంది. ఆమెపై హిందూ సంఘాల నేతలు సుల్తాన్ బజార్ పోలీస్ స్టేషన్‌లో కేసు కూడా పెట్టారు. తాను మాట్లాడిన మాటలు తప్పుగా అర్థం చేసుకున్నారంటూ సాయి పల్లవి వివరణ ఇచ్చిన విషయం తెలిసిందే.
అయితే ఇప్పడు మరోసారి వార్తల్లో నిలిచింది ఈ ఫిదా బ్యూటి.. తనను ‘లేడీ పవర్ స్టార్’ అంటుండడంపై సాయిపల్లవి స్పందించింది. విరాటపర్వం చిత్రంలో వెన్నెల పాత్రతో సాయిపల్లవి తెలుగు ప్రేక్షకుల హృదయాల్లో చెరగని స్థానం సంపాదించుకుంది. తన నటనతో విమర్శకుల ప్రశంసలు సైతం అందుకుంటున్న సాయిపల్లవిని ‘లేడీ పవర్ స్టార్’ అంటున్నారు.
అయితే తన పేరుకు ముందు ట్యాగ్ లు తగిలించడం సరికాదని అభిప్రాయపడింది. ప్రేక్షకుల ప్రేమాభిమానాలను దృష్టిలో ఉంచుకుని తాను మంచి పాత్రల్లో నటించడంపై శ్రద్ధ చూపిస్తానే తప్ప, ఇలాంటి ట్యాగ్ లను ఇష్టపడబోనని స్పష్టం చేసింది. ఇలాంటి ట్యాగ్ ల కారణంగా మనమీద మనమే ఒత్తిడి పెంచుకున్నట్టవుతుందని, అది నటనపైనా ప్రభావం చూపుతుందని సాయిపల్లవి వివరించింది.
