నెలసరి నొప్పులతో ఇబ్బందిపడుతున్నారా?

నెలసరి సమయంలో వచ్చే నొప్పులు (పీరియడ్ క్రాంప్స్) రోజువారీ జీవితాన్ని పూర్తిగా అస్తవ్యస్తం చేయగలవు. శక్తిని తగ్గించి, చిన్న పనులు కూడా కష్టంగా అనిపించేలా చేస్తాయి. ఇలాంటి వేళల్లో చాలామంది వెంటనే నొప్పి నివారణ మందుల వైపు మొగ్గు చూపుతారు. అయితే ప్రతిసారీ మందులే మొదటి పరిష్కారం కావాల్సిన అవసరం లేదని నొప్పి వైద్య నిపుణులు చెబుతున్నారు. సాధారణ ఇంటి చిట్కాలే నొప్పిని సహజంగా తగ్గించగలవు. శరీరంలోని ఇన్‌ఫ్లమేషన్‌ను తగ్గించి, కండరాలను రిలాక్స్ చేసి, రక్త ప్రసరణను మెరుగుపరచి నొప్పిని తగ్గిస్తాయని వివరించారు.

నెలసరి నొప్పులు ఎందుకు వస్తాయి?

నెలసరి సమయంలో శరీరం ప్రోస్టాగ్లాండిన్స్ అనే రసాయనాలను విడుదల చేస్తుంది. ఇవి గర్భాశయం సంకోచం కావడానికి కారణమవుతాయి, తద్వారా లోపలి పొర బయటకు వస్తుంది. ప్రోస్టాగ్లాండిన్స్ స్థాయి ఎక్కువగా ఉన్నప్పుడు నొప్పి ఎక్కువగా అనిపిస్తుంది.

నెలసరి నొప్పులను తగ్గించే 5 సులభమైన ఇంటి చిట్కాలు

1. కడుపు దిగువ భాగంలో వేడి పెట్టడం నొప్పిని తగ్గించడంలో అత్యంత ప్రభావవంతమైన పద్ధతి. వేడి వల్ల గర్భాశయ కండరాలు సడలిపోతాయి, రక్త ప్రసరణ మెరుగవుతుంది. హాట్ వాటర్ బ్యాగ్ లేదా హీటింగ్ ప్యాడ్ వాడటం ప్రభావం చూపుతుందని పరిశోధనలు చెబుతున్నాయి.

2. అల్లం, చామోమైల్, సోంపు టీలు సహజ యాంటీ-ఇన్‌ఫ్లమేటరీ లక్షణాలు కలిగి ఉంటాయి. ముఖ్యంగా అల్లం నొప్పి తీవ్రతను తగ్గించడంలో మంచి ఫలితాలు ఇస్తుందని డాక్టర్ సూద్ తెలిపారు.

3. మాగ్నీషియం కండరాల సంకోచాన్ని నియంత్రించడంలో సహాయపడితే, విటమిన్ B1 నరాల పనితీరును మెరుగుపరుస్తుంది. ఇవి క్రమం తప్పకుండా తీసుకుంటే నొప్పి తీవ్రత, వ్యవధి తగ్గుతుందని అధ్యయనాలు సూచిస్తున్నాయి.

Also Read:UAEలో కుండపోత వర్షాలు

4. ఒమేగా-3 ఫ్యాటీ యాసిడ్లు శరీరంలో వాపును తగ్గిస్తాయి. అలాగే నెలసరి సమయంలో మానసిక స్థితిని కూడా స్థిరంగా ఉంచుతాయి. చేపలు, ఫ్లాక్స్ సీడ్స్‌లో ఇవి సమృద్ధిగా ఉంటాయి.

5. పూర్తి విశ్రాంతి అవసరమే అయినా, నడక, స్ట్రెచింగ్ లేదా యోగా వంటి తేలికపాటి వ్యాయామాలు రక్త ప్రసరణను పెంచి, సహజ నొప్పి నివారణ హార్మోన్లైన ఎండార్ఫిన్స్ విడుదలకు సహాయపడతాయి. కొన్ని నిమిషాల వ్యాయామం కూడా ఉపశమనాన్ని ఇస్తుంది.