కన్నడ పవర్‌ స్టార్‌ పునీత్ రాజ్‌కుమార్‌ హఠాన్మరణం సినీ లోకాన్ని దిగ్భ్రాంతికి గురి చేసింది. ఈయన మృతికి తమిళ సూపర్‌ స్టార్‌ రజనీకాంత్ సంతాపం వ్యక్తం చేశారు. పునీత్ రాజ్ కుమార్ మరణం నుంచి కన్నడ సినీ పరిశ్రమ, అభిమానులు ఇంకా తేరుకోనేలేదు. ఏదో ఒక రకంగా ఆయన్ను గుర్తు చేసుకుంటూనే ఉన్నారు. ఇటీవల జిమ్‌లో వర్కౌట్లు చేస్తూ పునీత్ గుండెపోటుతో మరణించిన సంగతి తెలిసిందే. తాజాగా సూపర్‌ స్టార్‌ రజనీ.. పునీత్ మృతిపై స్పందించారు.
అయితే రజనీ కాస్త ఆలస్యంగా సంతాపం వ్యక్తం చేశారు. అందుకు కారణం లేకపోలేదు. ఆయన ఆసుపత్రిలో చికిత్స తీసుకుంటున్న సమయంలోనే పునీత్ మరణించిన సంగతి తెలిసిందే. తాజాగా డిశ్చార్జ్ అయి ఇంటికి వచ్చిన రజనీకాంత్.. పునీత్ మరణంపై చలించిపోయారు. తన కూతురు రూపొందించిన హూట్ యాప్‌లో సందేశాన్ని వినిపించారు. ‘‘నువ్వు లేవన్న విషయాన్ని నేను ఇంకా జీర్ణించుకోలేకపోతున్నాను పునీత్.. నీ ఆత్మకు శాంతి చేకూరాలని కోరుకుంటున్నా నాన్నా’’ అని చెప్పారు. ట్వీట్ ద్వారా పేర్కొన్నారు.
