తమిళ సినీ పరిశ్రమలో అరుదైన, చారిత్రక పరిణామం చోటుచేసుకుంది. సూపర్స్టార్ రజినీకాంత్ నటిస్తున్న 173వ చిత్రంపై అధికారిక ప్రకటన వెలువడింది. ఈ చిత్రాన్ని రాజ్ కమల్ ఫిల్మ్ ఇంటర్నేషనల్ సంస్థ ప్రకటించడం విశేషం. ముఖ్యంగా, ఈ సినిమాకు కమల్ హాసన్ నిర్మాతగా వ్యవహరించనుండటం సినీ అభిమానుల్లో భారీ ఉత్సాహాన్ని రేపుతోంది.
ఈ ప్రతిష్టాత్మక ప్రాజెక్ట్కు యువ దర్శకుడు శిబి చక్రవర్తి దర్శకత్వం వహించనున్నారు. ఇప్పటికే వినూత్న కథనంతో గుర్తింపు పొందిన శిబి, ఈ చిత్రంలో రజినీకాంత్ను కొత్త కోణంలో చూపించనున్నారని సమాచారం. నిర్మాతలుగా కమల్ హాసన్తో పాటు ఆర్. మహేంద్రన్ కూడా భాగస్వామ్యం కావడం ఈ ప్రాజెక్ట్కు మరింత బలం చేకూరుస్తోంది.
రజినీకాంత్, కమల్ హాసన్—తమిళ సినీ చరిత్రలో రెండు మహా స్థంభాలుగా నిలిచిన ఈ ఇద్దరి కలయిక నిర్మాత-నటులుగా జరగడం ఇదే తొలిసారి కాదు, కానీ ఈ స్థాయిలో భారీ అంచనాలు నెలకొన్న ప్రాజెక్ట్ చాలా అరుదు. అభిమానులు ఈ సినిమాను ఒక మైలురాయి చిత్రంగా అభివర్ణిస్తున్నారు. ఈ సినిమా 2027 సంక్రాంతికి ప్రపంచవ్యాప్తంగా విడుదల కానుంది. ఇంకా నటీనటులు, సాంకేతిక బృంద వివరాలు వెల్లడికావాల్సి ఉంది. అయితే, రజినీకాంత్ 173వ సినిమా కావడం, కమల్ హాసన్ నిర్మాణంలో రావడం వల్లే ఈ చిత్రం ఇప్పటికే భారీ బజ్ను సొంతం చేసుకుంది.
Also Read:బళ్లారి వివాదం..ఎస్పీపై సస్పెన్షన్ వేటు