‘ఎన్టీఆర్’ జీవితకథ ఆధారంగా నందమూరి బాలకృష్ణ ఓ చిత్రాన్ని తెరకెక్కిస్తున్న సంగతి తెలిసిందే. తేజ దర్శకత్వం వహిస్తున్న ఈ చిత్ర ప్రారంభోత్సవ వేడుక మార్చి 29న ఘనంగా జరిగింది. ఈ చిత్రంలో బాలకృష్ణతో పాటు ఎవరెవరు కనిపించబోతున్నారన్న సంగతులు ఇంకా బయటకు రాలేదు. కానీ ఎన్టీఆర్ అల్లుడు నారా చంద్రబాబు నాయుడు పాత్ర కోసం హీరో రాజశేఖర్ ను ఎంపిక చేస్తారని తాజా సమాచారం.
ఇటీవల జరిగిన ‘ఎన్టీఆర్’ చిత్ర ప్రారంభోత్సవానికీ రాజశేఖర్ హాజరయ్యారు. అప్పటినుంచి బాలకృష్ణ, రాజశేఖర్ కలిసి నటించబోతున్నారన్న ప్రచారం జరుగుతుంది. కాగా, బాలకృష్ణ సినిమాలో చిన్నపాత్రలో నటించే అవకాశం ఇచ్చినా చేస్తానని ఆమధ్య ‘గరుడవేగ’ చిత్రం ప్రమోషన్ కార్యక్రమంలో రాజశేఖర్ అనడం, ఇందుకు బాలయ్య స్పందిస్తూ, ‘చిన్నపాత్ర ఎందుకు? మల్టీ స్టారర్ చేద్దాం’ అని చెప్పడం ఈ సందర్భంగా గమనార్హం.
ఈ చిత్రానికి సంబంధించి ప్రస్తుతం బాలీవుడ్‌ నిపుణులతో వివిధ పాత్రలకు సంబంధించిన స్కెచ్చులు రూపొందిస్తున్నారు. ఏ పాత్రకు ఎవరు? అనేది ఆ స్కెచ్చుల పని పూర్తయ్యాకే తెలుస్తుంది. మరోవైపు ‘ఎన్టీఆర్’ చిత్రం రెండు భాగాలుగా రాబోతోందన్న వార్త చక్కర్లు కొడుతోంది. దీనిపైనా చిత్రబృందం ఇంకా ఓ నిర్ణయానికి రాలేదట. వీటిపై స్పష్టత రాలేదని సన్నిహిత వర్గాలు తెలిపాయి.
