కేకేఆర్ ఆటగాళ్లపై రహానే ప్రశంసలు

ఇండియన్ ప్రీమియర్ లీగ్ (IPL) 2026 సీజన్‌లో కోల్‌కతా నైట్ రైడర్స్ (KKR) ప్రయాణం ముగిసిన తర్వాత ఆ జట్టు కెప్టెన్ అజింక్యా రహానే తన ఆటగాళ్ల పోరాట పటిమను చూసి గర్వపడుతున్నట్లు తెలిపాడు. లీగ్ ప్రారంభంలో వరుస ఓటములతో ఇబ్బంది పడినప్పటికీ, సెకండ్ హాఫ్‌లో జట్టు అద్భుతంగా పుంజుకుందని కొనియాడాడు.

తీవ్రమైన ఒత్తిడి ఉన్న సమయంలోనూ జట్టు సభ్యులు చూపించిన ఐక్యత, సానుకూల దృక్పథం, మరియు పట్టుదల తనను ఎంతగానో ఆకట్టుకున్నాయని రహానే పేర్కొన్నాడు. ప్లే-ఆఫ్స్‌కు అర్హత సాధించలేకపోవడం నిరాశ కలిగించినప్పటికీ, ఈ సీజన్ నుండి ఎన్నో సానుకూల అంశాలను తాము తీసుకుంటున్నామని చెప్పాడు. ఈ మూడు సార్లు ఐపీఎల్ ఛాంపియన్ అయిన కేకేఆర్ జట్టు ఈ సీజన్ పాయింట్ల పట్టికలో ఏడో స్థానంతో సరిపెట్టుకుంది.ఆదివారం రాత్రి ఢిల్లీ క్యాపిటల్స్‌తో జరిగిన చివరి లీగ్ మ్యాచ్‌లో కేకేఆర్ 40 పరుగుల తేడాతో ఓటమి పాలైన సంగతి తెలిసిందే.

మాకు ఈ సీజన్ సాగిన విధానం గురించి మాట్లాడితే.. జట్టులోని ప్రతి ఒక్కరినీ చూసి నేను నిజంగా గర్విస్తున్నాను. మొదటి ఆరు మ్యాచ్‌ల తర్వాత మేము ఉన్న పరిస్థితి నుండి మళ్లీ పుంజుకుని, లీగ్‌లో పోటీని సజీవంగా ఉంచడం అంత సులువు కాదు. అలాంటి క్రికెట్ ఆడటానికి గొప్ప వ్యక్తిత్వం, మంచి వైఖరి మరియు పట్టుదల అవసరం. తొలి భాగంలో కొన్ని కీలక క్షణాల్లో తడబడటం వల్ల మ్యాచ్‌లు చేజారాయని, కానీ ఐపీఎల్ లాంటి సుదీర్ఘమైన టోర్నమెంట్‌లో ఒత్తిడిని అధిగమించి డ్రెస్సింగ్ రూమ్‌లో సానుకూల వాతావరణాన్ని కాపాడుకోవడం సంతోషాన్ని ఇచ్చిందని రహానే తెలిపాడు.

Also Read:శక్తిమాన్‌గా అల్లు అర్జున్?