గ్రీన్లాండ్ను స్వాధీనం చేసుకోవాలన్న అమెరికా అధ్యక్షుడు డొనాల్డ్ ట్రంప్ తాజా ప్రయత్నాలపై రష్యాకు ఎలాంటి ఆసక్తి లేదని రష్యా అధ్యక్షుడు వ్లాదిమిర్ పుతిన్ స్పష్టం చేశారు. ఈ అంశం వాషింగ్టన్, డెన్మార్క్తో పాటు ఇతర నాటో మిత్రదేశాల మధ్య ఉద్రిక్తతలకు కారణమవుతున్నప్పటికీ, దీనిలో రష్యా జోక్యం ఉండదని ఆయన తేల్చిచెప్పారు.
రష్యా జాతీయ భద్రతా మండలి సమావేశంలో టెలివిజన్ ద్వారా ప్రసంగించిన పుతిన్, గ్రీన్లాండ్ భవిష్యత్తు రష్యాకు సంబంధించిన విషయం కాదని వ్యాఖ్యానించారు. ఈ అంశాన్ని సంబంధిత దేశాలే పరస్పరం పరిష్కరించుకోవాలని ఆయన సూచించారు. గ్రీన్లాండ్కు ఏం జరుగుతుందో అది మా విషయం కాదు అని పుతిన్ స్పష్టం చేశారు. అసలు చెప్పాలంటే, డెన్మార్క్ గ్రీన్లాండ్ను ఎప్పుడూ ఒక కాలనీలా చూసింది. అక్కడి ప్రజలపై కఠినంగా, కొన్ని సందర్భాల్లో క్రూరంగా కూడా వ్యవహరించింది. కానీ అది వేరే విషయం. ప్రస్తుతానికి దానిపై ఎవరికీ ఆసక్తి ఉందని నేను అనుకోవడం లేదు. ఇది మాకు సంబంధించిన అంశం కాదు. వారు తమలో తామే దీనిని పరిష్కరించుకుంటారు అని పుతిన్ అన్నారు.
ఈ సందర్భంగా పుతిన్ చరిత్రను గుర్తు చేశారు. 1917లో డెన్మార్క్ తన వర్జిన్ ఐలాండ్స్ను అమెరికాకు విక్రయించింది అని తెలిపారు. అలాగే 1867లో రష్యా అలాస్కాను అమెరికాకు 7.2 మిలియన్ డాలర్లకు విక్రయించింది అని కూడా గుర్తుచేశారు.
Also Read:‘స్వయంభూ’..విడుదల తేదీ వాయిదా!
ఈ పరిణామాల నేపథ్యంలో గ్రీన్లాండ్ ప్రభుత్వం తమ పౌరులకు అప్రమత్తంగా ఉండాలని సూచించింది. సంక్షోభ పరిస్థితుల్లో ఎలా వ్యవహరించాలనే అంశంపై ఇంగ్లిష్, గ్రీన్లాండిక్ భాషల్లో ఒక మార్గదర్శక పుస్తకాన్ని విడుదల చేసింది. అందులో కనీసం ఐదు రోజుల పాటు సరిపడే ఆహారం, నీరు, ఇంధనం, అవసరమైన సరఫరాలు ఇంట్లో నిల్వ ఉంచుకోవాలని ప్రజలను కోరింది.