బాహుబలి సినిమాతో దేశవ్యాప్తంగా రాజమౌళి పేరు మారుమోగిపోతుంది. రాజమౌళిని పొగడ్తల్లో ముంచేస్తున్నారు. బాహుబలి: ది క‌న్‌క్లూజ‌న్‌ తో ప్రపంచ వ్యాప్త మేనియా మొదలైందని బాలీవుడు దర్శకుడు, నిర్మాత కరణ్ జోహార్‌ అనగా.. ‘బాహుబలి2.. భారత సినీరంగంలో ఓ అద్భుత కాన్వాస్‌. ఈ చిత్రంతో ఒక్క తెలుగు సినిమానే కాదు, భారతీయ చిత్రాలను కూడా ఓ కొత్త స్థాయికి తీసుకెళ్లారు. హ్యాట్సాఫ్ రాజమౌళి..’ అంటూ ‘బాహుబలి: ది కంక్లూజన్’ చూసి దేశంలో ఎంతోమంది ప్రముఖులు రాజమౌళిని ఆకాశానికెత్తేస్తున్నారు. తాజాగా సూపర్ స్టార్ రజినీకాంత్.. సెన్సేషనల్ డైరెక్టర్ శంకర్‌లు రాజమౌళి గురించి ఆసక్తికర కామెంట్స్ చేశారు.
‘బాహుబలి-2’ చూసిన అనంతరం రజినీకాంత్ చాలా ఉద్వేగంగా స్పందించాడు. బాహుబలి-2 ఇండియన్ సినిమాకు గర్వకారణమని.. దేవుడి సొంత బిడ్డ (గాడ్స్ ఓన్ చైల్డ్) అయిన రాజమౌళికి.. అతడి టీంకు సెల్యూట్ చేస్తున్నానని రజినీ ట్వీట్ చేయడం విశేషం.
శంకర్ సైతం మన జక్కన్న గురించి చాలా గొప్పగా మాట్లాడాడు. ”ఇప్పుడే బాహుబలి-2 చూశా. ఇది భారతీయ సినిమాకు గర్వకారణం. ఎంత ధైర్యం.. ఎంత అందం.. ఎంత భారీతనం.. ఎంత గొప్ప మ్యూజిక్. మాటలు రావట్లేదు. ‘రాజ’మౌళికి అతడి టీంకు హ్యాట్సాఫ్” అని శంకర్ ట్వీట్ చేశాడు. రాజమౌళిని రజినీ లాంటి సూపర్ స్టార్ గాడ్స్ ఓన్ చైల్డ్ అనడం.. శంకర్ లాంటి దర్శకుడు ‘రాజ’మౌళి అని సంబోధించడం అంటే చిన్న విషయం కాదు.
ఇప్పటివరకూ సౌతిండియాలో చాలా ఖరీదైన డైరెక్టర్ ఎవరంటే ఠక్కున శంకర్ అని చెప్పేస్తాం.. ఇప్పుడు ఆ సమాధానం మారింది.. బాహుబలి రికార్డుల దెబ్బకు ఆ స్థానంలో దర్శకధీరుడు రాజమౌళి వచ్చి చేరాడు. ప్రస్తుతం రోబో సీక్వల్ గా 2.0 సినిమా తీస్తున్న శంకర్, సూపర్ స్టార్ రజినికాంత్ ను మరోసారి రోబోగా చూపించడానికి సిద్ధమైన శంకర్, సినిమాను చాలా జాగ్రత్తగా తీస్తున్నాడట. ఎలా అయిన ఈ సినిమాతో భారే హిట్ అందుకుని మళ్ళీ తన టాప్ ప్లేస్ ను కైవసం చేసుకుంటాడు శంకర్ అని తమిళ తంబీలు ఆశపడుతున్నారు.
