తిరుపతికి చేరుకున్న రాష్ట్రపతి రామ్ నాథ్ కోవింద్..

ఆంధ్రప్రదేశ్ లో 3రోజుల పర్యటన కోసం ఇవాళ తిరుపతి చేరుకున్నారు రాష్ట్రపతి రామ్ నాధ్ కోవింద్. రేణిగుంట విమానాశ్రయంలో గవర్నర్ నరసింహన్, సీఎం జగన్ రాష్ట్రపతికి స్వాగతం పలికారు. రాష్ట్రపతి దంపతులు తిరుచానూరు శ్రీపద్మావతి అమ్మవారి దర్శనార్థం రేణిగుంట విమానాశ్రయం నుండి రోడ్డు మార్గంలో బయల్దేరి వెళ్ళారు. అనంతరం అక్కడినుంచి వచ్చి తిరుపతిలోని శ్రీ కపిలేశ్వర స్వామిని దర్శించుకుంటారు.

ఆదివారం జులై 14 ఉదయం శ్రీవారిని దర్శించుకుంటారు.మధ్నాహ్నం 3 గంటలకు హెలికాప్టర్ లో నెల్లూరు జిల్లా శ్రీహరికోట షార్ సెంటర్ కు చేరుకుంటారు. జులై 15వ తేదీ తెల్లవారుజామున 2.50 గంటలకు షార్‌ సెంటర్లో ఇస్రో శాస్త్రవేత్తలు చంద్రయాన్‌-2 ప్రయోగం జరపనున్నారు.