భారత ప్రధాని నరేంద్ర మోదీకి ఇథియోపియా దేశ అత్యున్నత పౌర పురస్కారమైన ‘ది గ్రేట్ హానర్ నిషాన్ ఆఫ్ ఇథియోపియా’ ను ప్రదానం చేశారు. ఈ ప్రతిష్ఠాత్మక గౌరవాన్ని అందుకున్న తొలి ప్రపంచ దేశాధినేతగా మోదీ చరిత్ర సృష్టించారు. ప్రస్తుతం విదేశీ పర్యటనలో ఉన్న ప్రధాని మోదీకి ఇథియోపియా ప్రభుత్వం ఈ అవార్డు అందించడం భారత్–ఇథియోపియా ద్వైపాక్షిక సంబంధాల్లో మరో కీలక ఘట్టంగా నిలిచింది.
ఇథియోపియా రాజధాని అడిస్ అబాబాలోని నేషనల్ ప్యాలెస్ మ్యూజియంను ప్రధాని మోదీ సందర్శించారు. ఈ సందర్భంగా ఇథియోపియా చరిత్ర, సంస్కృతి, వారసత్వానికి సంబంధించిన విశేషాలను ప్రత్యక్షంగా తెలుసుకున్నారు. మ్యూజియంలో ఉన్న అరుదైన వస్తువులు, చారిత్రక ఆధారాలు మోదీని విశేషంగా ఆకట్టుకున్నాయి. ఈ పర్యటన సందర్భంగా ఇథియోపియా ప్రధాని అబియ్ అహ్మద్ అలీ స్వయంగా మోదీకి దేశ చరిత్ర, సంస్కృతి గురించి వివరించారు.
ఈ సందర్భంగా ప్రధాని మోదీ సోషల్ మీడియా వేదికగా స్పందించారు. ఇథియోపియా చరిత్ర, సంస్కృతి గురించి ఆసక్తికరంగా వివరించినందుకు ప్రధాని అబియ్ అహ్మద్ అలీకి కృతజ్ఞతలు తెలిపారు. ఈ గౌరవం భారతదేశానికి దక్కిన గర్వకారణమని పేర్కొన్న మోదీ, ఇథియోపియాతో భారత్కు ఉన్న పురాతన స్నేహబంధాలు భవిష్యత్తులో మరింత బలపడతాయని ఆశాభావం వ్యక్తం చేశారు. ఈ పురస్కారం భారత దౌత్య విజయంగా విశ్లేషకులు అభిప్రాయపడుతున్నారు.
Also Read:వాట్సాప్ డేటా సేకరణ..అనుమతి తప్పనిసరి!