నేటి నుంచి ప్రధాని నరేంద్ర మోదీ కీలక విదేశీ పర్యటనకు బయలుదేరనున్నారు. ఈ పర్యటనలో భాగంగా జోర్డాన్, ఇథియోపియా, ఒమన్ దేశాలను ప్రధాని సందర్శించనున్నారు. ఈ నెల 18వ తేదీ వరకు కొనసాగనున్న ఈ పర్యటన రాజకీయ, ఆర్థిక, దౌత్య పరంగా భారత్కు అత్యంత కీలకంగా భావిస్తున్నారు.
ప్రధాని మోదీ పర్యటనలో ఆయా దేశాల అగ్రనేతలతో ద్వైపాక్షిక చర్చలు జరపనున్నారు. ముఖ్యంగా వాణిజ్యం, పెట్టుబడులు, ఇంధన రంగం, మౌలిక సదుపాయాలు, రక్షణ, సాంకేతికత వంటి రంగాల్లో సహకారాన్ని మరింత బలోపేతం చేసే దిశగా చర్చలు జరగనున్నాయి. ఈ సందర్భంగా పలు వాణిజ్య ఒప్పందాలు, అవగాహన ఒప్పందాలపై సంతకాలు చేసే అవకాశముందని అధికార వర్గాలు తెలిపాయి.
జోర్డాన్ పర్యటనలో మధ్యప్రాచ్య పరిణామాలు, ప్రాంతీయ భద్రత అంశాలపై చర్చలు జరిగే అవకాశం ఉంది. ఇథియోపియాలో ఆఫ్రికా దేశాలతో భారత్ సంబంధాలను మరింత విస్తరించడంపై ప్రధాని దృష్టి సారించనున్నారు. ఒమన్ పర్యటనలో ఇంధన భద్రత, ప్రవాస భారతీయుల సంక్షేమం, సముద్ర భద్రత వంటి అంశాలు ప్రధానంగా చర్చకు రానున్నాయి.
Also Read:నిర్మాణ రంగంలోకి వెంకీ కుడుముల
ఈ విదేశీ పర్యటన ద్వారా భారత్కు అంతర్జాతీయంగా మరింత ప్రాధాన్యం పెరగడంతో పాటు, ఆర్థిక సహకారం కొత్త దశకు చేరుకుంటుందని విశ్లేషకులు అభిప్రాయపడుతున్నారు.