మాస్ మహారాజా రవితేజ హీరోగా వీఐ ఆనంద్ దర్శకత్వంలో తెరకెక్కుతున్న చిత్రం ‘డిస్కో రాజా’ . ఆగస్టు 4 నుంచి నెక్ట్స్‌ షెడ్యూల్‌లో ఢిల్లీలో రెండు వారాల పాటు జరగనుంది. కొంతకాలంగా సినిమా షూటింగ్‌కు బ్రేక్ పడగా తాజాగా వరుస షెడ్యూల్స్‌లో సినిమా చేసేందుకు చిత్రయూనిట్ ప్లాన్ సిద్ధం చేసింది. ఢిల్లీ షెడ్యూల్‌ అనంతరం తదుపరి షెడ్యూలును స్విట్జర్లాండ్ లో ప్లాన్ చేస్తున్నారు. ఇందులో పాయల్ రాజ్ పుత్, నభా నటేష్, తాన్యా హోప్ హీరోయిన్లుగా నటిస్తున్నారు.
ఇక మూవీ ప్రమోషన్‌లో భాగంగా పాయల్ రాజ్‌పుత్‌.. రవితేజతో కలిసి దిగిన ఫోటో సోషల్‌ మీడియాలో వైరల్‌ అవుతోంది. ఈ సినిమాలో సునీల్, వెన్నెల కిశోర్, సత్య, రామ్‌కీ తదితరులు నటిస్తుండగాతమన్‌ సంగీతం అందిస్తున్నారు.
నేల టిక్కెట్ తర్వాత ఎస్ ఆర్ టి ఎంటర్టైన్మెంట్స్ అధినేత రామ్ తాళ్ళూరి, రవితేజ తో నిర్మిస్తున్న రెండో చిత్రమిది. రామ్ తాళ్ళూరి ఈ చిత్రాన్ని భారీగా నిర్మించనున్నారు. వరుస ఫ్లాపులతో ఉన్న రవితేజ గతేడాది అమర్‌అక్బర్‌ఆంటోని చిత్రంతో పలకరించినా ఆశించిన విజయాన్ని అందుకోలేకపోయాడు. అందుకే డిస్కోరాజా మూవీపై భారీ అంచనాలు పెట్టుకున్నారు. మరి రవితేజ అంచనాలను ఈ మూవీ నిలబెడుతుందా లేదో వేచిచూడాలి.
