సుకుమార్‌ దర్శకత్వంలో రామ్‌చరణ్‌ కథానాయకుడిగా నటిస్తున్న చిత్రం ‘రంగస్థలం 1985’. పీరియాడిక్ లవ్ ఎంటర్టైనర్ గా తెరకెక్కుతున్న ఈ సినిమాను సంక్రాంతి కానుకగా రిలీజ్ చేసేందుకు ప్లాన్ చేస్తున్నారు. ఇప్పటి వరకు టైటిల్ లోగోను మాత్రమే రిలీజ్ చేసిన చిత్రయూనిట్, దసరా సందర్భంగా ఫస్ట్ లుక్ పోస్టర్ ను రిలీజ్ చేయాలని భావిస్తున్నారు.
ఈ కార్యక్రమానికి పవర్‌స్టార్‌ పవన్‌కల్యాణ్‌ హాజరుకానున్నట్లు టాలీవుడ్‌ వర్గాల సమాచారం. అంతేకాదు ఫస్ట్‌లుక్‌ను ఆయన చేతుల మీదుగా విడుదల చేయనున్నట్లు తెలుస్తోంది. ‘రంగస్థలం’ చిత్రంలో రామ్‌చరణ్‌కు జోడీగా సమంత నటిస్తోంది. సినిమా చిత్రీకరణ మొత్తం రాజమండ్రిలో జరిగింది. గతంలో చెర్రీ హీరోగా తెరకెక్కిన నాయక్ సినిమా ఆడియో ఫంక్షన్ లో పాల్గొన్న పవర్ స్టార్ పవన్ కళ్యాణ్ తరువాత చరణ్ సినిమాలకు సంబంధించిన ఏ వేడుకలోనూ పాలు పంచుకోలేదు. ఇన్నాళ్లకు రంగస్థలం 1985 ఫస్ట్ లుక్ ను పవన్ చేతుల మీదుగా రిలీజ్ చేయనున్నారట. దీనిపై అధికారిక సమాచారం లేనప్పటికీ మెగా ఫ్యాన్స్‌ మాత్రం ఫుల్‌ ఖుషీగా ఉన్నారు. మరోపక్క పవన్.. త్రివిక్రమ్‌ దర్శకత్వంలో వస్తున్న ఓ చిత్రంలో నటిస్తున్నారు. పవన్ పుట్టినరోజు సందర్భంగా సినిమా కాన్సెప్ట్‌ పోస్టర్‌ను విడుదల చేసిన సంగతి తెలిసిందే.
