నందమూరి బాలకృష్ణ హీరోగా ప్రఖ్యాత నటుడు నందమూరి తార‌క‌రామారావు జీవిత నేప‌థ్యంలో దర్శకుడు క్రిష్ ఎన్టీఆర్ అనే సినిమా తెర‌కెక్కిస్తున్న సంగ‌తి తెలిసిందే. రెండు పార్ట్‌లుగా రానున్న ఈ చిత్రం జనవరి 9న ‘యన్.టి.ఆర్-కథానాయకుడు’, జనవరి 24న ‘యన్.టి.ఆర్- మహానాయకుడు’గా ప్రేక్ష‌కుల ముందుకు రానుంది.
ఎన్టీఆర్ కెరియర్‌లో ఎన్నో గొప్ప చిత్రాలు ఉన్నాయి. అయితే అందులో చెప్పుకోదగిన చిత్రాల జాబితాలో ‘పాతాళ భైరవి’ మొదటి వరుసలో కనిపిస్తుంది. తెలుగు జానపద చిత్రాల జాబితాలోను ఈ సినిమా ముందు వరుసలోనే కనిపిస్తుంది. ఒక ట్రెండ్ సెట్టర్ లా నిలిచిన ఈ సినిమాలో ఎన్టీ రామారావు ‘తోట రాముడు’ పాత్రలో ప్రేక్షకులను మెప్పించారు.
అయితే ఎన్టీఆర్ బయోపిక్‌లో బాలకృష్ణ కూడా ‘తోట రాముడు’గా తెరపై సందడి చేయనున్నాడు. ఎన్టీఆర్ బయోపిక్‌లో ‘పాతాళ భైరవి’ సినిమాకి సంబంధించిన సన్నివేశాలు కూడా వున్నాయి. దర్శకుడు క్రిష్ ప్రస్తుతం ఆ సన్నివేశాలను చిత్రీకరిస్తున్నాడు. ‘తోట రాముడు’గా బాలకృష్ణ అదరగొట్టేస్తున్నాడని సమాచారం. ఈ పాత్రకి సంబంధించిన పోస్టర్‌ను కూడా క్రిష్ త్వరలో వదిలే అవకాశం ఉందని తెలుస్తోంది.
