యంగ్ టైగర్‌ ఎన్టీఆర్ హోస్ట్‌గా తెలుగులో ‘బిగ్ బాస్’ షో త్వరలోనే ప్రారంభం కానుంద‌న్న విష‌యం తెలిసిందే. తాజాగా స్టార్ మా ట్విట్ట‌ర్ ద్వారా ఇందుకు సంబంధించిన టీజ‌ర్‌ను ఈ రోజు విడుదల చేసింది. ఈ టీజర్‌కు ప్ర‌ముఖ సంగీత ద‌ర్శ‌కుడు ఎస్.ఎస్. థమన్ నేపథ్య సంగీతం అందించాడు. అంతేకాదు ‘బిగ్ బాస్’ కోసం ఆయ‌న సంగీతం ద‌ర్శ‌క‌త్వంలోనే టైటిల్ సాంగ్‌ కూడా సిద్ధ‌మ‌వుతోంది. ఇందులో ఎన్టీఆర్ క‌న‌ప‌డుతున్న లుక్ అదుర్స్ అనిపిస్తోంది. బ్లాక్ సూట్‌, కొత్త హెయిర్ స్టైల్‌తో ఎన్టీఆర్ అమితంగా ఆక‌ట్టుకుంటున్నాడు. సినిమా టీజర్ రేంజ్ లో ఉన్న ఎన్టీఆర్ టీవీషో టీజ‌ర్‌ను మీరూ చూడండి…
ఈ షోలో ఏం చేస్తారంటే.. ప్రత్యేకంగా నిర్మించిన ఒక ఇంట్లో, సుమారు పన్నెండుమంది సెలబ్రిటీలను పంపి, తాళం వేసేస్తారు. వాళ్లకు అవసరమైన అన్ని వసతులూ కల్పిస్తారు. అయితే బయటి ప్రపంచంతో కానీ, సెల్‌ఫోన్ లు, టీవీలు, దినపత్రికలు వంటి మాధ్యమాలతో కానీ సంబంధం ఉండదు. ఆ ఇల్లే వారి ప్రపంచం. వాళ్ల ప్రతి కదలికను కెమెరాలు రికార్డ్‌ చేస్తుంటాయి. వాళ్ల నడవడికను, జీవన శైలిని ప్రేక్షకులు గమనిస్తుంటారు. భిన్న రంగాలకు చెందిన సెలబ్రిటీలు ప్రపంచంతో సంబంధంలేని ఆ చోట ఎలా ఉంటారనేదే ఆసక్తికర అంశం.
