టాలీవుడ్ లో మరో క్రేజీ కాంబినేషన్ ‘సెట్’ అయినట్లే కనిపిస్తుంది. దీనిని దర్శక ధీరుడు ఎస్‌.ఎస్‌ రాజమౌళి తెరకెక్కించే అవకాశాలు ఉన్నాయి. మల్టీస్టారర్‌ చిత్రంగా రాజమౌళి తెరకెక్కిస్తున్నారని ఇందులో రామ్‌చరణ్‌, ఎన్టీఆర్‌ కథానాయకులుగా నటించనున్నారని కొంతకాలంగా వార్తలు వెలువడుతున్నాయి. అయితే ఈ చిత్రాన్ని ‘జక్కన్న’ క్రీడా నేపథ్యంలో తెరకెక్కించే అవకాశం ఉన్నట్లు తెలుస్తోంది. అయితే దర్శకధీరుడు తెరకెక్కించబోయే మల్టీస్టారర్‌ చిత్రం గురించి రోజుకో కొత్త విషయం బయటికొస్తోంది.
ఈమూవీలో చరణ్‌, తారక్‌ బాక్సర్లుగా నటిస్తున్నారని తెలుస్తోంది. ఇప్పుడు మరో ఆసక్తికరమైన విషయం బయటికొచ్చింది. ఓ కుటుంబ కథను ఆధారంగా తీసుకుని ఈ చిత్రాన్ని తెరకెక్కిస్తారట. అదే నిజమైతే అది ఎవరి కుటుంబం గురించి అన్నది తెలియాల్సి ఉంది. అదీకాకుండా కుటుంబ కథా నేపథ్యం ఉన్న చిత్రాలకు జక్కన్న అంతగా ప్రాధాన్యం ఇవ్వరు. అలాంటి నేపథ్యంలో ఆయన దర్శకత్వంలో వచ్చిన చిత్రం ‘మర్యాద రామన్న’. ఆ తర్వాత ఫాంటసీలు, గ్రాఫిక్స్‌ ఎక్కువగా ఉండే చిత్రాలను తెరకెక్కించారు. దాంతో ఇప్పుడు తీయబోయే చిత్రంపై అంచనాలు పెరిగిపోతున్నాయి. అంతేకాదు.. తొలి సన్నివేశం తారక్‌పైనే చిత్రీకరించనున్నారట. అన్నీ అనుకున్నట్లు కుదిరితే సినిమా 2018 అక్టోబర్‌లో ప్రారంభమయ్యే అవకాశం ఉంది.
