దేశంలో సామాన్య ప్రజలకు నాణ్యమైన వైద్యం, మందులు అందుబాటులో ఉండేలా చూసే దిశగా కేంద్ర ప్రభుత్వం కీలక నిర్ణయం తీసుకుంది. జాతీయ ఔషధ ధరల నియంత్రణ సంస్థ (NPPA) వివిధ వ్యాధుల చికిత్సలో ఉపయోగించే 39 కొత్త ఔషధాల రిటైల్ ధరలను ఖరారు చేస్తూ ఉత్తర్వులు జారీ చేసింది.
ఔషధాల ధరల నియంత్రణ చట్టం (DPCO), 2013 లోని నిబంధనల ప్రకారం ఈ కొత్త ధరలను నిర్ణయించినట్లు ఎన్పీపీఏ ఒక ప్రకటనలో తెలిపింది. ఈ నిర్ణయం వల్ల మధుమేహం (డయాబెటిస్), రక్తపోటు (బీపీ), గుండె జబ్బులు మరియు వివిధ రకాల ఇన్ఫెక్షన్ల నివారణకు వాడే మందుల ధరలు నియంత్రణలోకి రానున్నాయి.
ధరలు ఖరారైన ముఖ్యమైన మందులు:
మధుమేహం : సిటಗ್లిప్టిన్ ఫాస్ఫేట్ + మెట్ఫార్మిన్ హైడ్రోక్లోరైడ్ మాత్రలు.
రక్తపోటు : టెల్మిసార్టన్ + క్లోర్తాలిడోన్ + సిల్నిడిపైన్ కాంబినేషన్ మాత్రలు.
కడుపులో మంట మరియు గ్యాస్ సమస్యలు: యాంటాసిడ్ విభాగంలో ఉపయోగించే ప్రొటాన్ పంప్ ఇన్హిబిటర్ కాంబినేషన్లు.
ఇన్ఫెక్షన్ల నివారణ (Antibiotics): కొన్ని ప్రత్యేకమైన యాంటీ-బయోటిక్ మరియు యాంటీ-ఫంగల్ మందులు.
ఎన్పీపీఏ నిబంధనల ప్రకారం ఏ తయారీ సంస్థ లేదా ఫార్మసీ కూడా ప్రభుత్వం నిర్ణయించిన ఈ గరిష్ట రిటైల్ ధర (MRP) కంటే ఎక్కువ ధరకు మందులను విక్రయించకూడదు. ఒకవేళ ఏ కంపెనీ అయినా నిబంధనలను ఉల్లంఘిస్తే చట్టపరమైన చర్యలతో పాటు వడ్డీతో సహా జరిమానా చెల్లించాల్సి ఉంటుంది.
భారతదేశంలో వైద్య ఖర్చులలో అత్యధిక భాగం మందుల కొనుగోలుకే ఖర్చవుతుంటుంది. ముఖ్యంగా దీర్ఘకాలిక వ్యాధులైన బీపీ, డయాబెటిస్ ఉన్నవారు ప్రతి నెలా మందులు కొనడం భారంగా మారుతోంది. ఈ నేపథ్యంలో ఎన్పీపీఏ క్రమబద్ధంగా మందుల ధరలను సమీక్షించి, రిటైల్ ధరలపై క్యాప్ (పరిమితి) విధించడం వల్ల దేశంలోని కోట్ల మంది రోగులకు, ముఖ్యంగా మధ్యతరగతి మరియు పేద కుటుంబాలకు భారీ ఆర్థిక ఉపశమనం లభించనుంది.ఈ కొత్త ధరలు తక్షణమే అమలులోకి వస్తాయని, అన్ని ఔషధ కంపెనీలు సవరించిన ధరల పట్టికను విక్రయదారులకు మరియు వినియోగదారులకు అందుబాటులో ఉంచాలని ఎన్పీపీఏ ఆదేశించింది.
Also Read:కామిశెట్టి దర్శకత్వంలో రోషన్!