త్వరలో ప్రారంభమయ్యే ఐసీసీ పురుషుల టీ20 ప్రపంచకప్కు న్యూజిలాండ్ టీ20 జట్టులో జాకబ్ డఫీకి చోటు దక్కింది. ఇది పేసర్ డఫీకి తొలి ప్రపంచకప్ కావడం విశేషం. 2025 క్యాలెండర్ సంవత్సరంలో అంతర్జాతీయంగా 81 వికెట్లు పడగొట్టిన అద్భుత ప్రదర్శనకు గుర్తింపుగా అతడికి ఈ మెగా టోర్నమెంట్లో అవకాశం లభించింది.
అనుభవజ్ఞుడైన మిచెల్ సాంట్నర్ జట్టుకు నాయకత్వం వహించనున్నాడు. టిమ్ రాబిన్సన్, బెవాన్ జేకబ్స్, జకరీ ఫౌల్క్స్ 15 మంది జట్టులో చోటు దక్కించుకోలేకపోయారు. కైల్ జేమీసన్ను ట్రావెలింగ్ రిజర్వ్గా ఎంపిక చేశారు.
డఫీతో పాటు పేస్ విభాగంలో లాకీ ఫర్గూసన్, మ్యాట్ హెన్రీ, ఆడమ్ మిల్న్ ఉన్నారు. జేమ్స్ నీషమ్ అవసరమైతే బౌలింగ్ చేయగలడు. స్పిన్ విభాగంలో సాంట్నర్కు తోడుగా దశాబ్దం క్రితం భారత్లో జరిగిన ఇదే టోర్నీలో ఆడిన ఇష్ సోధీ ప్రధాన స్పిన్నర్గా ఉన్నాడు.బ్యాటింగ్లో ఫిన్ అలెన్తో కలిసి వికెట్కీపర్ టిమ్ సైఫర్ట్ ఓపెనింగ్ చేయనున్నాడు. డెవన్ కాన్వే, మార్క్ చాప్మన్, గ్లెన్ ఫిలిప్స్, రచిన్ రవీంద్ర మిగతా బ్యాటింగ్ బాధ్యతలు నిర్వహిస్తారు.
గ్రూప్ డీలో న్యూజిలాండ్కు అఫ్గానిస్థాన్, కెనడా, దక్షిణాఫ్రికా, యూఏఈ జట్లు ప్రత్యర్థులుగా ఉన్నాయి. ఫిబ్రవరి 8న చెన్నైలో అఫ్గానిస్థాన్తో తొలి మ్యాచ్ ఆడనుంది. ఫిబ్రవరి 10న అదే వేదికపై యూఏఈతో తలపడనుంది. ఫిబ్రవరి 14న అహ్మదాబాద్లో దక్షిణాఫ్రికాతో కీలక మ్యాచ్ జరగనుండగా, ఫిబ్రవరి 17న మళ్లీ చెన్నైలో కెనడాతో గ్రూప్ దశను ముగించనుంది.
న్యూజిలాండ్ టీ20 ప్రపంచకప్ జట్టు:
మిచెల్ సాంట్నర్ (కెప్టెన్), ఫిన్ అలెన్, మైఖేల్ బ్రేస్వెల్, మార్క్ చాప్మన్, డెవన్ కాన్వే, జాకబ్ డఫీ, లాకీ ఫర్గూసన్, మ్యాట్ హెన్రీ, డారిల్ మిచెల్, ఆడమ్ మిల్న్, జేమ్స్ నీషమ్, గ్లెన్ ఫిలిప్స్, రచిన్ రవీంద్ర, టిమ్ సైఫర్ట్ (వికెట్కీపర్), ఇష్ సోధీ
Also Read:TTD:రేపటితో వైకుంఠ దర్శనాలు క్లోజ్!