నేపాల్లోని బీర్గంజ్ పట్టణంలో మత ఉద్రిక్తతలు తీవ్ర రూపం దాల్చడంతో, మసీదు ధ్వంసం మరియు ఖురాన్ దహనం ఘటనల అనంతరం కర్ఫ్యూ కొనసాగిస్తున్నారు. ధనుషా జిల్లాలో జరిగిన ఈ ఘటనలు ముస్లిం, హిందూ వర్గాల మధ్య ఉద్రిక్తతలను మరింత పెంచాయి. రెండు వర్గాల నిరసనలు హింసాత్మకంగా మారడంతో పోలీసులు జోక్యం చేసుకుని పలువురిని అదుపులోకి తీసుకున్నారు.
నేపాల్ పర్సా జిల్లాలోని జిల్లా పరిపాలనా కార్యాలయం (DAO) బీర్గంజ్లో మంగళవారం మధ్యాహ్నం 1 గంటల వరకు కర్ఫ్యూను పొడిగించింది. స్థానిక పరిపాలనా చట్టం–2028 (బీఎస్) లోని సెక్షన్ 6(a) ప్రకారం జారీ చేసిన ఈ ఆదేశాల ప్రకారం, నిర్ణీత పరిధిలో ప్రజల రాకపోకలు, కార్యకలాపాలన్నీ నిషేధించబడ్డాయి. తూర్పున ఈస్టర్న్ బైపాస్ రోడ్ నుంచి పడమర వైపు సిర్సియా బ్రిడ్జి వరకు, ఉత్తరాన పవర్ హౌస్ చౌక్ నుంచి దక్షిణాన శంకరాచార్య గేట్ వరకు కర్ఫ్యూ అమల్లో ఉంటుంది.
అత్యవసర అవసరాలు తప్ప ప్రజలు ఇళ్లలోనే ఉండాలని అధికారులు విజ్ఞప్తి చేశారు. కర్ఫ్యూ నిబంధనలు ఉల్లంఘించిన వారిపై కఠిన చర్యలు తీసుకునే అధికారం భద్రతా బలగాలకు ఉందని హెచ్చరించారు. అత్యవసర ప్రయాణాల కోసం సమీప భద్రతా సిబ్బందిని సంప్రదించి అనుమతి తీసుకోవాలని సూచించారు.
కర్ఫ్యూ సమయంలో అత్యవసర సేవలకు సంబంధించిన వాహనాలకు అనుమతి ఉంటుందని డీఏఓ స్పష్టం చేసింది. అంబులెన్సులు, అగ్నిమాపక వాహనాలు, శవవాహనాలు, ఆరోగ్య సిబ్బంది, జర్నలిస్టులు, పర్యాటకులను తీసుకెళ్లే వాహనాలు రాకపోకలు సాగించవచ్చు. మానవ హక్కుల సంస్థలు, దౌత్య కార్యాలయాలకు చెందిన వాహనాలు, చెల్లుబాటు అయ్యే విమాన టికెట్లు ఉన్న ప్రయాణికుల వాహనాలకు కూడా పోలీసుల పర్యవేక్షణలో అనుమతి ఉంటుంది.
సోమవారం బీర్గంజ్లో పరిస్థితి ఉద్రిక్తంగానే కొనసాగింది. ధనుషా జిల్లాలోని కమలా మున్సిపాలిటీ–6లో ఈ వివాదానికి నాంది పలికిన ఘటన చోటుచేసుకుంది. సఖువా మదన్లోని ముస్లిం నివాస ప్రాంతంలో గుర్తుతెలియని వ్యక్తులు మసీదును ధ్వంసం చేసి, ఖురాన్ ప్రతిని దహనం చేసినట్లు ఆరోపణలు ఉన్నాయి. ఈ ఘటనకు సంబంధించిన దృశ్యాలు, సమాచారం సోషల్ మీడియాలో వేగంగా వ్యాప్తి చెంది ప్రజల్లో ఆగ్రహాన్ని రగిలించాయి.
Also Read:పంట కొనుగోలుకై ఆదిలాబాద్ బంద్