ఆంధ్రప్రదేశ్లోని శ్రీకాకుళం జిల్లాలో ఉన్న బూటుపేట ప్రభుత్వ పాఠశాలలో వినూత్న బోధనా విధానాలు అమలు చేస్తూ ప్రధానోపాధ్యాయురాలు అరుణకుమారి అందరి ప్రశంసలు అందుకుంటున్నారు. విద్యార్థులకు సులభంగా అర్థమయ్యే విధంగా క్రియేటివ్ పద్ధతుల్లో బోధిస్తూ ఆమె ప్రత్యేక గుర్తింపు పొందారు.
ఈ పాఠశాలలో ప్రస్తుతం కేవలం 20 మంది విద్యార్థులు మాత్రమే ఉన్నప్పటికీ, వారికి ఉత్తమ విద్య అందించేందుకు అరుణకుమారి తన సొంత ఖర్చులతో పలు కార్యక్రమాలు చేపడుతున్నారు. షార్ట్ ఫిల్మ్స్, వర్కింగ్ మోడల్స్ వంటి పద్ధతుల ద్వారా పాఠాలను ప్రాక్టికల్గా అర్థమయ్యేలా బోధిస్తున్నారు. దీంతో విద్యార్థులు ఆసక్తిగా చదువుకుంటూ మంచి ఫలితాలు సాధిస్తున్నారు.
తక్కువ ఖర్చుతో ఎక్కువ ప్రయోజనం ఉండేలా బోధన విధానాలను రూపొందించడం ఆమె ప్రత్యేకతగా నిలిచింది. అంతేకాకుండా స్కూల్ యూనిఫాం వేసుకుని విద్యార్థులతో మమేకం అవుతూ వారికి స్నేహపూర్వక వాతావరణం కల్పిస్తున్నారు.
ఈ విషయాన్ని సోషల్ మీడియా వేదిక ఎక్స్ (ట్విట్టర్) లో ప్రస్తావిస్తూ ఆంధ్రప్రదేశ్ విద్యాశాఖ మంత్రి నారా లోకేష్ అరుణకుమారిని అభినందించారు. ఆమె చేస్తున్న సేవలు ఏపీ విద్యా వ్యవస్థకు ఆదర్శంగా నిలుస్తాయని ఆయన పేర్కొన్నారు.
Also Read:ఊబకాయంతో క్యాన్సర్ ముప్పు?
అరుణకుమారి వంటి ఉపాధ్యాయులు విద్యా రంగానికి గొప్ప ప్రేరణ అని మంత్రి లోకేష్ ప్రశంసించారు. విద్యార్థులకు నాణ్యమైన విద్య అందించడంలో ఆమె చూపుతున్న అంకితభావం ప్రశంసనీయమని అన్నారు.