నాని హీరోగా నటించి, నిన్న విడుదల అయిన ఎమ్‌సీఏ-మిడిల్ క్లాస్ అబ్బాయ్ సినిమా వసూళ్ల విషయంలో హై క్లాస్ అనిపించుకుంటోంది. మిక్స్డ్ రివ్యూలు, యావరేజ్ రేటింగులు పొందిన ఈ సినిమా వసూళ్లలో మాత్రం సూపర్ అనిపించుకుంటోంది.
తొలిరోజు బాక్సాఫీసు వద్ద విశేషమైన వసూళ్లు రాబట్టినట్లు సినీ విశ్లేషకులు చెబుతున్నారు. నాని గత చిత్రం నిన్నుకోరి ఓపెనింగ్స్‌ కంటే ఎం.సి.ఎ అత్యధికంగా వసూలు చేసినట్లు సమాచారం. ఈ సినిమా ప్రపంచ వ్యాప్తంగా తొలిరోజున దాదాపు రూ.15 కోట్లు వసూలు చేసినట్లు తెలుస్తోంది. నాని గత చిత్రం తొలిరోజు వసూళ్లకి ఈ మొత్తం రెండింతలు ఎక్కువట.
యూఎస్‌లో సైతం ఎంసీఏ వసూళ్ల జోరు కొనసాగిస్తోంది. ఏకంగా మూడు లక్షల డాలర్ల మొత్తాన్ని ప్రీమియర్ షోల ద్వారానే రాబట్టుకుందట నాని సినిమా. శ్రీ వెంకటేశ్వర క్రియేషన్స్‌ పతాకంపై దిల్‌రాజు ఈ చిత్రాన్ని నిర్మించారు. భూమిక, రాజీక్‌ కనకాల, నరేశ్‌, ఆమని, ప్రియదర్శిని పులికొండ ప్రధాన పాత్రలు పోషించారు. దేవిశ్రీ ప్రసాద్‌ స్వరాలు సమకూర్చారు.
ప్రస్తుతం నాని ‘కృష్ణార్జున యుద్ధం’ సినిమాలో నటిస్తున్నారు. దీని తర్వాత నాగార్జునతో కలిసి ఓ మల్టీస్టారర్‌లోనటించనున్నట్లు తెలుస్తోంది.
