అక్కినేని నాగేశ్వ‌ర‌రావు, నాగార్జున, నాగ చైత‌న్య, అఖిల్ ముఖ్య పాత్ర‌ల‌లో విక్ర‌మ్ కుమార్ తెర‌కెక్కించిన చిత్రం మ‌నం. ఈ సినిమా అక్కినేని ఫ్యామిలీకి ఎన్నో జ్ఞాప‌కాల‌ని మిగిల్చింది. మెమోర‌బుల్ మూవీగా ఈ చిత్రాన్ని ఇప్ప‌టికి గుర్తు చేసుకుంటూనే ఉన్నారు అక్కినేని ఫ్యామిలీ స‌భ్యులు. ఇప్పుడు ఇదే స్టైల్‌లో నంద‌మూరి ఫ్యామిలీ కుటుంబ చిత్రం కూడా తెర‌కెక్క‌నుంద‌నే వార్త సోష‌ల్ మీడియాలో చ‌క్క‌ర్లు కొడుతుంది.
ప్రస్తుతం కల్యాణ్ రామ్ ‘ఎమ్మెల్యే’ .. ‘నా నువ్వే’ సినిమాలు చేస్తున్నాడు. ఈ రెండు సినిమాలు కూడా డిఫరెంట్ కాన్సెప్ట్ తో రూపొందుతున్నవే. ఒక సినిమాలో కాజల్ హీరోయిన్ అయితే .. మరో సినిమాలో తమన్నా హీరోయిన్. ఈ రెండు సినిమాలపై కల్యాణ్ రామ్ బలమైన నమ్మకంతో వున్నాడు. ఇక తన తదుపరి సినిమాను ఆయన పవన్ సాధినేనితో చేయడానికి రెడీ అవుతున్నాడు. కల్యాణ్ రామ్ సొంత బ్యానర్లో .. ఏప్రిల్ రెండవ వారంలో ఈ సినిమా సెట్స్ పైకి వెళ్లనుంది.
ఫాంటసీ థ్రిల్లర్ నేపథ్యంలో ఈ కథ కొనసాగుతుందట. కథా పరంగా .. నిడివి తక్కువగా గల రెండు ముఖ్యమైన పాత్రలు అవసరం కావడంతో, హరికృష్ణ .. ఎన్టీఆర్ లతో ఆ పాత్రలను చేయించాలనే ఆలోచనలో వున్నారని సమాచారం. ఆ ఇద్దరూ చేస్తే సినిమాపై మరింత క్రేజ్ పెరుగుతుందని భావిస్తున్నారట. త్వరలోనే కథానాయికలు ఎవరనేది ప్రకటించనున్నట్టు తెలుస్తోంది.
