స్టైలిష్ స్టార్ అల్లు అర్జున్ తెలిసి అన్నాడో, తెలియక అన్నాడో.. లేదా ఫ్లోలో అన్నాడో గానీ పవర్ స్టార్ గురించి మాట్లాడను అని చెప్పడం అప్పట్లో పెద్ద కాంట్రవర్సీ అయిన సంగతి తెలిసిందే. ఈ క్రమంలో పవర్ స్టార్ పవన్ కల్యాణ్ అభిమానుల ఆగ్రహానికి కారకుడయ్యాడు అల్లు అర్జున్. అప్పటి నుంచి బన్నీ అంటేనే చాలు తెగ ఫైర్ అయిపోతున్నారు పవన్ అభిమానులు. ఆ ఆగ్రహాన్ని అప్పట్లో విడుదలైన డీజే-దువ్వాడ జగన్నాథం టీజర్‌పై చూపించేశారు. ఎన్ని లైకులు కొట్టారో.. దాదాపు అన్నే డిస్‌లైకులను కొట్టేశారు పవన్ అభిమానులు.
అయితే పవన్ కళ్యాణ్ అభిమానులతో వైరం పెట్టుకున్నప్పటికీ అల్లు అర్జున్ బండి ఎలాగోలా నడిచిపోయింది. కానీ ఇప్పుడు మెగాస్టార్ అభిమానులతోనూ కయ్యం మొదలైంది. ‘దువ్వాడ జగన్నాథం’ విడుదలకు ముందు.. తర్వాత అల్లు అర్జున్ చేసిన కొన్ని వ్యాఖ్యలు చిరంజీవి అభిమానులకు కూడా ఆగ్రహం తెప్పించాయి. మెగాస్టార్ తో పోలికలపై స్పందించిన తీరు.. ఆపై ‘దువ్వాడ జగన్నాథం’ కలెక్షన్ల గురించి చేసిన వ్యాఖ్యలు మెగా అభిమానుల్లోని ఓ వర్గం వారికి రుచించలేదు. చివరికి దిల్ రాజు ఆఫీస్ దగ్గరికెళ్లి చిరు అభిమానులు గొడవ చేసేవరకు పరిస్థితి వెళ్లింది. ‘డీజే’ గురించి నెగెటివ్ గా మాట్లాడిన.. రాసిన వాళ్లందరినీ బన్నీ టార్గెట్ చేయడం వల్ల కూడా బన్నీ ఎక్కువమందికి శత్రువుగా మారిపోయాడు. అతడి గురించి నెగెటివ్ ప్రచారం ఎక్కువైపోయింది. ఇంతకుముందు పవన్ కళ్యాణ్ పేరు వాడుకుని తర్వాత అడ్డం తిరిగాడని.. ఇప్పుడు చిరంజీవి విషయంలోనూ అలాగే ప్రవర్తిస్తున్నాడని బన్నీ గురించి వ్యతిరేక ప్రచారం సోషల్ మీడియాలో గట్టిగా జరుగుతోంది.
దీంతో ఇప్పుడు బన్నీకి పట్టిన మరకను కడిగేసే ప్రయత్నంలో పడింది అతడి పీఆర్ టీం. బన్నీతో పాటు అతడి పీఆర్వోల సహాయ సహకారాలతో ‘అల్లు అర్జున్ ఫ్యాన్ క్లబ్’ పేరుతో ట్విట్టర్లో ఒక ఒక అకౌంట్ రన్ అవుతోంది. అందులో నిరంతరం అప్ డేట్స్ ఉంటాయి. బన్నీని ఓ రేంజ్ లో పొగుడుతూ.. అతడి గురించి అప్ డేట్స్ ఇస్తుంటారు. ఇందులో తాజాగా ఒక ఫొటో పెట్టారు. అది బన్నీ ఆఫీసుకు సంబంధించిన ఫొటో. అందులో గోడ మీద చిరంజీవి చిత్రం ఉంది.
బన్నీకి చిరంజీవి అంటే ఎంత గౌరవాభిమానాలున్నాయో చెప్పడానికి ఈ ఫొటోనే రుజువు అంటూ దీన్ని షేర్ చేసింది అల్లు అర్జున్ ఆర్మీ. దీన్ని బట్టి చూస్తే బన్నీ గురించి ఈ మధ్య జరిగిన వ్యతిరేక ప్రచారాన్ని అతడి చుట్టూ ఉన్నవాళ్లు కొంచెం సీరియస్ గానే తీసుకున్నారని.. సైలెంటుగా ఉంటే డ్యామేజ్ మరింత పెరుగుతుందని భయపడుతున్నారని అర్థమవుతోంది. మరోవైపు బన్నీ పీఆర్వోలు కూడా బన్నీ పట్ల మెగా అభిమానుల్లో నెలకొన్న వ్యతిరేకతను తగ్గించే ప్రయత్నంలో ఉన్నట్లు తెలుస్తోంది. మరి టీం వర్క్‌ ఎంత ప్రభావం చూపుతుందో చూద్దాం.
