వైసీపీ అధినేత జగన్‌తో భేటీ అయ్యారు హీరో మంచు విష్ణు. ఫ్యామిలీతో హైదరాబాద్‌లోని జగన్ నివాసానికి చేరుకున్న మంచు విష్ణు ..కాసేపు జగన్‌తో ముచ్చటించారు. జగన్‌కి మంచు విష్ణు భార్య విరోనికా బంధువు కావడంతో మర్యాదపూర్వకంగా భేటీ అయినట్లు తెలుస్తోంది. గుంటూరులోని తాడేపల్లిలో జగన్ గృహప్రవేశానికి వీరు హాజరుకాలేదు.
అయితే ట్విట్టర్ ద్వారా శుభాకాంక్షలు తెలిపిన విష్ణు దంపతులు ఇవాళ జగన్‌ని కలిశారు. అందమైన ఇంటిలో జగన్ అన్నకు అంతా మంచే జరగాలని ఆ దేవుడిని కోరుకుంటున్నా. మీ కలలను సాకారం చేసుకునే దిశగా ఆ దేవుడు మీకు మరింత శక్తిని ఇవ్వాలని ప్రార్థిస్తున్నా అని ట్వీట్ చేశారు విరోనిక.
ఇక ఇటీవలె సినీనటుడు నాగార్జున,అలీ జగన్‌తో భేటీ కావడం ప్రాధాన్యత సంతరించుకున్న సంగతి తెలిసిందే. వీరిద్దరు త్వరలో ఏపీ నుండి వైసీపీ తరపున పోటీచేసేందుకు ఆసక్తికనబరుస్తున్నట్లు వార్తలు వెలువడ్డాయి. ఇక జూనియర్ ఎన్టీఆర్ మామ,ఏపీ సీఎం చంద్రబాబు దగ్గరిబంధువు నార్నె శ్రీనివాసరావు వైసీపీ తీర్థం పుచ్చుకున్న సంగతి తెలిసిందే.
