కార్పొరేట్ కంపెనీల వ్యాపార వ్యవహారాల్లో ప్రభుత్వాలు, రాజకీయ నాయకులు జోక్యం చేసుకోకూడదని బీఆర్ఎస్ వర్కింగ్ ప్రెసిడెంట్ కేటీఆర్ అన్నారు. కంపెనీలు తమ వ్యాపారాలను స్వేచ్ఛగా నిర్వహించుకునే వాతావరణాన్ని ప్రభుత్వాలు కల్పించాలని సూచించారు. ఉద్యోగాలు కల్పించే సంస్థలను ఇబ్బందులకు గురిచేయకుండా, హైదరాబాద్‌ను ప్రశాంతమైన నగరంగా ఉంచడంపై పాలకులు దృష్టి సారించాలని పేర్కొన్నారు.
హైదరాబాద్‌లో రాండమ్ ట్రీస్ (RandomTrees) కొత్త కార్యాలయాన్ని కేటీఆర్ ప్రారంభించారు. ఈ సందర్భంగా ఆయన మాట్లాడుతూ.. కార్పొరేట్ సంస్థల వ్యవహారాల్లో ఈడీ, ఐటీ, సీబీఐ వంటి దర్యాప్తు సంస్థల పేరుతో అనవసరమైన జోక్యం చేసుకోవడం సరికాదన్నారు. ఉద్యోగాలు కల్పించే కంపెనీలను ఇబ్బందులకు గురిచేస్తే పెట్టుబడులపై ప్రతికూల ప్రభావం పడుతుందని అభిప్రాయపడ్డారు.
ప్రభుత్వాల ప్రధాన బాధ్యత మౌలిక సదుపాయాలను మెరుగుపరచడమేనని కేటీఆర్ స్పష్టం చేశారు. నగరంలో రహదారులను బాగు చేయడం, నీటి సరఫరా సక్రమంగా ఉండేలా చూడటం, వీధి దీపాలు వెలిగేలా చర్యలు తీసుకోవడం, సీసీ కెమెరాలు పనిచేసేలా పర్యవేక్షించడం ప్రభుత్వాల బాధ్యత అని అన్నారు. హైదరాబాద్‌లో శాంతిభద్రతలను కాపాడుతూ, వ్యాపార సంస్థలకు అనుకూలమైన వాతావరణాన్ని కల్పించాలని పేర్కొన్నారు.
యాపిల్ సీఈఓ టిమ్ కుక్ సమక్షంలో కేటీఆర్ గతంలో చేసిన ప్రసంగం తనను ఎంతగానో ప్రభావితం చేసిందని రాండమ్ ట్రీస్ సీఈఓ ప్రవీణ్ కోలా తెలిపారు. ఆ ప్రసంగం స్ఫూర్తితోనే తన కంపెనీని హైదరాబాద్‌లోనే స్థాపించాలని నిర్ణయించుకున్నట్లు వెల్లడించారు.హైదరాబాద్‌లో ఐటీ, సాంకేతిక రంగాలకు అనుకూలమైన వాతావరణం ఉండటంతో పాటు, ప్రతిభావంతులైన యువత అందుబాటులో ఉండటం సంస్థల అభివృద్ధికి దోహదపడుతుందని భావిస్తున్నారు. రాండమ్ ట్రీస్ కొత్త కార్యాలయం ప్రారంభం నగరంలో సాంకేతిక రంగ కార్యకలాపాల విస్తరణకు మరో ముందడుగుగా నిలిచింది.
Also Read:Delhi AQI..అప్‌డేట్