హుజుర్‌నగర్‌లో గులాబీ జెండా ఎగిరింది. హుజుర్‌నగర్‌ ఉప ఎన్నిక ఫలితంలో టీఆర్ఎస్ అభ్యర్థి శానంపూడి సైదిరెడ్డి భారీ మెజార్టీతో విజయం సాధించారు. 43,284 ఓట్ల మెజార్టీతో కాంగ్రెస్‌ అభ్యర్థి ఉత్తమ్‌ పద్మావతిరెడ్డిపై శానంపూడి సైదిరెడ్డి గెలుపొందారు. టీఆర్ఎస్ ఘన విజయంపై ఆ పార్టీ నేత కవిత స్పందించారు. సీఎం కేసీఆర్ పై అచంచలమైన విశ్వాసాన్ని ప్రదర్శించిన, టీఆర్ఎస్ కు అపురూపమైన విజయాన్ని అందించిన హుజుర్‌నగర్‌ ప్రజలకు తన ధన్యవాదాలు తెలియజేస్తున్నట్టు చెప్పారు. ఈ విజయం కోసం నిరంతరం పాటుపడ్డ టీఆర్ఎస్ కుటుంబ సభ్యులందరికీ అభినందనలు తెలియజేస్తూ ఓ ట్వీట్ చేశారు.
భారీ మెజార్టీతో గెలుపొందిన సైదిరెడ్డికి టీఆర్ఎస్ నాయకులు, కార్యకర్తలు శుభాకాంక్షలు తెలుపుతున్నారు. ఇక ఇటు తెలంగాణ భవన్‌లో అటు ఉమ్మడి నల్లగొండ జిల్లాలో టీఆర్ఎస్ శ్రేణుల సంబురాలు అంబరాన్నంటాయి. ఇక ఈ ఉప ఎన్నిక ఫలితాల్లో మొత్తం 22 రౌండ్లలోనూ సైదిరెడ్డినే ఆధిక్యం ప్రదర్శించారు. కాంగ్రెస్‌ అభ్యర్థి పద్మావతి రెండో స్థానానికి పరిమితం కాగా, మూడో స్థానంలో స్వతంత్ర అభ్యర్థి సపావత్‌ సుమన్‌ నిలిచాడు. బీజేపీ నాలుగో స్థానానికి, టీడీపీ ఐదో స్థానానికి పడిపోయింది.
కెసిఆర్ గారి పైన అచంచలమైన విశ్వాసాన్ని ప్రదర్శించి, తెరాస పార్టీ కి అపురూపమైన విజయాన్ని అందించిన హుజూర్నగర్ ప్రజలకు ధన్యవాదాలు 🙏🙏 ఈ విజయం కోసం నిరంతరం శ్రమించిన తెరాస కుటుంబ సభ్యులందరికి శుభాకాంక్షలు !! Jai Telangana !! Jai TRS !! Jai KCR !! #TRSForTelangana pic.twitter.com/1giKcYXeic
— Kavitha Kalvakuntla (@RaoKavitha) October 24, 2019
