తమిళ సూపర్ స్టార్ రజనీకాంత్ పొలిటికల్ ఎంట్రీ సంగతేమో కానీ.. ఆ పేరిట జరుగుతున్న హడావుడి అంతా ఇంతా కాదు. అసలు రజినీ రాజకీయాల్లోకి వచ్చేస్తున్నారంటూ కొద్ది రోజులుగా మీడియాలో వస్తున్న వార్తలు.. దానిపై తమిళ సంఘాలు విరుచుకుపడుతున్న వైనం ఇప్పుడు సంచలనంగా మారాయి.
ఇక ఇదిలా ఉంటే.. రజినీకాంత్, కమల్ హాసన్‌ల మధ్య ఏం జరిగిందో అర్ధంకాకుండా పోతోంది. ఉన్నట్టుండీ.. తలైవాపై.. కమల్ హాసన్ సంచలన వ్యాఖ్యలు చేశారు. ఇప్పుడా వ్యాఖ్యలు పెను దుమారాన్ని రేపుతున్నాయి. తాజాగా ఒక జాతీయ ఛానల్ తో ప్రత్యేకంగా మాట్లాడిన కమల్ హాసన్.. రజనీపై తనదైన స్టైల్లో సెటైర్లు వేశారు.
కెమెరాలు ఎక్కడుంటే అక్కడ రజనీ కనిపిస్తారన్న కమల్.. ఆయనకు కెమెరాలు కనిపిస్తే హడావుడి చేయటం అలవాటే.. అందుకే హడావుడి చేస్తున్నారంటూ వ్యాఖ్యానించారు. గతవారం రాజకీయాలపై మాట్లాడుతూ రజినీకాంత్ చేసిన వ్యాఖ్యలపై మీరు ఏమని స్పందిస్తారు అని అడిగినప్పుడు కమల్ ఈ విధంగా స్పందించారు.
అంతేకాకుండా మొదట ఆ ప్రశ్నకి సమాధానం చెప్పడానికి నిరాకరించిన కమల్ హాసన్.. టీవీ కెమెరాల ముందు తాను తన అభిప్రాయం చెప్పాల్సిన అవసరం ఏముందని ఎదురు ప్రశ్నించారు. ఇక సామాజిక కోణంలోనే కమల్ టీవీ షో చేస్తున్నట్లుగా పేర్కొన్నారు. ప్రజలతో మమేకం కావటం కోసమే తాను టీవీ షో చేస్తున్నట్లుగా కూడా వెల్లడించారు కమల్.
ఇదిలా ఉంటే.. తాను తమిళుడినేనంటూ రజనీ చెప్పటం.. దానికి వ్యతిరేకంగా పలు తమిళ సంఘాలు వ్యతిరేకంగా గళం విప్పుతున్న వేళ.. రజనీకి పాత మిత్రుడిగా పేరున్న కమల్.. తలైవాపై వ్యంగ్య వ్యాఖ్యలు చేయటం ఇప్పుడు హాట్ టాపిక్ గా మారింది. మొత్తానకి రానున్న రోజుల్లో ఇలాంటి పరిణామాలు ఎన్ని ఎదురవుతాయో చూడాలి.
