సౌతాఫ్రికాకు భారీ షాక్..రబాడా ఔట్!

క్రికెట్ సౌత్ ఆఫ్రికా (CSA) కు ఇది పెద్ద ఎదురుదెబ్బ. సెప్టెంబర్ 24 నుండి ఆస్ట్రేలియాతో దక్షిణాఫ్రికా వివిధ ఫార్మాట్ల సిరీస్‌లో తలపడనుంది.ఇరు జట్లు మొదట మూడు వన్డేలు, ఆ తర్వాత మూడు టెస్టు మ్యాచ్‌లు ఆడుతాయి. కుడి తొడ కండరాల గాయం వల్ల ఆస్ట్రేలియాతో వన్డే సిరీస్‌కు రబాడా దూరమయ్యాడు, ఇప్పుడు ఆస్ట్రేలియాతో టెస్టులకు కూడా ఆయన అందుబాటులో ఉండటంపై అనిశ్చితి నెలకొంది.

ఆగస్టు 21న CSA ఒక ప్రకటన విడుదల చేస్తూ గాయం కారణంగా రబాడా పునరావాస (రీహాబ్) ప్రక్రియకు అంతరాయం కలిగిందని తెలిపింది. ఈ వారంలో శిక్షణ సందర్భంగా కుడి తొడ కండరానికి గాయం కావడంతో రబాడా వింటర్ ట్రైనింగ్ ప్రోగ్రామ్‌కు అంతరాయం ఏర్పడింది. ప్రస్తుతం ఆయనను ప్రోటీస్ మెడికల్ టీమ్ పర్యవేక్షిస్తోంది, తదుపరి వైద్య పరీక్షలు నిర్వహిస్తారు అని CSA తెలిపింది.

తన డబ్ల్యూటీసీ (WTC) టైటిల్‌ను కాపాడుకునే దిశగా దక్షిణాఫ్రికా మళ్లీ WTC ఫైనల్‌కు చేరుకోవాలంటే రాబోయే 10 టెస్టుల్లో కనీసం 7 గెలవాల్సి ఉంటుంది. ఈ సైకిల్‌లో భాగంగా ఆస్ట్రేలియా, ఇంగ్లాండ్, బంగ్లాదేశ్‌లతో సొంతగడ్డపై ఆడుతూ శ్రీలంకలో పర్యటించనుంది.రబాడా కోలుకుంటున్న తీరును నిరంతరం పరిశీలిస్తున్నామని CSA మరొక ప్రకటనలో తెలిపింది. వన్డే సిరీస్‌కు ఆయన దూరం కాగా, టెస్ట్ సిరీస్‌లో ఆడటం అనేది ఆయన కోలుకునే వేగంపై ఆధారపడి ఉంటుందని వెల్లడించింది.

ఒకవేళ రబాడా టెస్టు సిరీస్‌కు దూరం అయితే, తమ స్టార్ బౌలర్ లేకుండానే ఈ కీలకమైన సిరీస్‌లో బరిలోకి దిగాల్సి రావడం దక్షిణాఫ్రికాకు పెద్ద దెబ్బ కానుంది.

Also Read:రూ.150 కోట్లు దాటిన ఇరుముడి

కాగిసో రబాడా ప్రస్తుతం CSA మెడికల్ టీమ్ నిశిత పరిశీలనలో తన కుడి తొడ కండరాల గాయం నుండి కోలుకోవడానికి తొలినాళ్ల పునరావాస ప్రక్రియను పూర్తి చేస్తున్నాడు. సెప్టెంబర్ 24 నుండి 30 వరకు జరగనున్న ఆస్ట్రేలియాతో మూడు వన్డేల సిరీస్‌కు ఆయన దూరం కానున్నాడు. ఆస్ట్రేలియాతో టెస్ట్ సిరీస్‌లో ఆయన భాగస్వామ్యం అనేది రీహాబ్ ప్రక్రియ పురోగతిపై ఆధారపడి ఉంటుంది, సిరీస్ ప్రారంభానికి కాస్త ముందుగా ఎంపికపై నిర్ణయం తీసుకుంటారు అని ప్రకటన పేర్కొంది.