సూపర్ స్టార్ రజనీకాంత్ హీరోగా నటించిన తాజా చిత్రం ‘కాలా’. ‘కబాలి’ చిత్రానికి దర్శకత్వం వహించిన పా.రంజిత్ ఈ సినిమాను తెరకెక్కించారు. రజినీకాంత్ అల్లుడు ధనుష్ సమర్పణలో ఉండర్‌బార్ ఫిల్మ్స్, లైకా ప్రొడక్షన్స్ సంయుక్తంగా నిర్మిస్తున్నాయి. ‘కబాలి’లో కొత్త రజినీకాంత్ చూపించిన దర్శకుడు రంజిత్.. ఇప్పుడు ‘కాలా’లోనూ తలైవాను డిఫరెంట్‌గా చూపిస్తున్నారు. జూన్ 7న ఈ చిత్రం ప్రేక్షకుల ముందుకు రానున్నది.
ఈ నేపథ్యంలోనే ఈ సినిమాలోని భయము ఎరుగడు.. ఎంత ఎదిగినా ఒదిగేవాడు.. మనము తలవగా మనసు పిలవగా కలత తీర్చేవాడు..యమగ్రేటు అనే గీతాన్ని చిత్రబృందం విడుదలచేసింది. ఈ సందర్భంగా చిత్ర నిర్మాత మాట్లాడుతూ కాలా ఎవరు? పేదవారికి అండగా నిలిచే క్రమంలో కొన్ని రాజకీయశక్తుల నుంచి అతడికి ఎలాంటి అడ్డంకులు ఎదురయ్యాయి? వారి కుతంత్రాల్ని కాలా ఎలా ఎదుర్కొన్నాడన్నదే ఈ చిత్ర ఇతివృత్తం అని అన్నారు. ముంబాయిలోని మురికివాడల నేపథ్యంలో సాగే కథ ఇది. రజనీకాంత్ పాత్రచిత్రణ స్టైలిష్‌గా ఉంటుంది. మానవీయ విలువలకు హీరోయిజాన్ని, రాజకీయ అంశాలను మేళవిస్తూ దర్శకుడు పా రంజిత్ ఈ చిత్రాన్ని తెరకెక్కించారు. ఈ సినిమాలో హ్యూమా ఖురేషీ, అంజలీ పాటిల్‌ కథానాయికలుగా నటిస్తున్నారు.
